मुंबई : मुंबई महानगरपालिकेच्या बेस्ट उपक्रमाला दररोज २ कोटी २६ लाख रुपयांचा तोटा सहन करावा लागत असल्याचे स्पष्ट झाले असून बेस्ट दिवसेंदिवस आर्थिक संकटात सापडत चालल्याचेच हे संकेत आहेत.
बेस्ट बससेवेला प्रति किलोमीटर येणारा खर्च, प्रवासी भाडे उत्पन्न आणि एकूण प्रवासी संख्या, अशी माहिती एका अर्जाद्वारे आरटीआय कार्यकर्ते अनिल गलगली यांनी विचारली होती. त्याच्या उत्तरात जी माहिती देण्यात आली आहे ती मुंबईकरांची ’लाइफलाइन’ असलेल्या बेस्टसेवेची चिंता वाढवणारीच आहे. बेस्टची दररोजची प्रवासी संख्या २८ लाख ३९ हजारांवर गेली आहे. या प्रवाशांकडून आकारण्यात येणार्‍या प्रवासभाड्याच्या माध्यमातून बेस्टला दररोज ३ कोटी ९० लाख रुपये एवढं उत्पन्न मिळालं आहे. ही जून २०१५ पर्यंतची आकडेवारी आहे. एकीकडे चार कोटींच्या घरात रोजचं उत्पन्न असणार्‍या बेस्टच्या नुकसानीचा आकडाही २ कोटी २६ लाखांवर गेला आहे. त्यामुळेच सगळं गणित बिघडत चाललं आहे, असेही उपलब्ध आकडेवारीवरून दिसते.
बेस्ट व्यवस्थापनाने बेस्ट सेवेवर होणार्‍या खर्चाचा अधिक तपशील देत फायदा आणि तोट्याचे गणित मांडले आहे. मे २०१५ पर्यंतच्या सरासरीनुसार प्रति किलोमीटर ९७.७५ रुपये याप्रमाणे ६.१६ कोटी रुपये एवढा दररोजचा खर्च असल्याचे या माहितीत नमूद करण्यात आले आहे. सर्वसाधारण सेवा ८ रुपये, लिमिटेड बस ८ रुपये, जलद बस १० रुपये आणि एसी बस ३० रुपये असे बेस्टबसचे किमान भाडे असल्याचेही उत्तरात स्पष्ट करण्यात आले आहे.
** मालाडचा प्रयोग पडू शकतो पथ्यावर!
दरम्यान, आर्थिक संकटातून बेस्टला बाहेर काढण्यासाठी अनेक योजनाही आखण्यात येत आहेत. मालाड आगाराचे व्यवस्थापक हेमंतकुमार वझे यांची ‘आयडिया’ तर बेस्टसाठी आदर्शच ठरली आहे. प्रवाशांना आकर्षित करण्यासाठी मालाड स्थानकाच्या बाहेर बेस्टचे टीसी व डेपोतील अधिकारी माईक हातात घेऊन उद्घोषणा करताना दिसत आहेत. त्यामुळे प्रवासी संख्याही वाढल्याचे वझे यांचे म्हणणे आहे. बेस्ट व्यवस्थापनाने या योजनेचे कौतुक करून अन्य आगारांनाही असे पाऊल उचलण्यास सांगितले आहे.
