साईनाथ भोईर
नवी मुंबई : महापालिका आयुक्त तुकाराम मुंढे शनिवारी विविध विभागांत जाऊन वॉक विथ कमिशनर उपक्रमांतर्गत नागरिकांशी थेट सुसंवाद साधत असून सर्वच ठिकाणी या उपक्रमाला नागरिकांचा चांगला प्रतिसाद लाभत आहे. या ४ मार्च २०१७ रोजी, सकाळी ६.३० वाजता ऐरोली मुलुंड पुलानजिक, सेक्टर १० कडे जाणार्‍या रस्त्याजवळ, भारतरत्न डॉ. बाबासाहेब आंबेडकर स्मारकासमोर, ऐरोली येथे वॉक विथ कमिशनर संपन्न होणार आहे. याप्रसंगी आयुक्तांशी संवाद साधून आपल्या सूचना / संकल्पना / तक्रारी सादर करू इच्छिणार्‍या नागरिकांनी सकाळी ६ वाजता उपक्रमास्थळी उपस्थित असणार्‍या विभाग कार्यालयाच्या प्रतिनिधीकडून टोकन नंबर प्राप्त करून महापालिका आयुक्तांकडे आपले लेखी निवेदन सादर करावयाचे आहे.
त्याचप्रमाणे आपले नवी मुंबई शहर प्लास्टिकमु्क्त करण्याच्या संकल्प पुर्तीसाठी यावेळी विशेष प्लास्टिक प्रतिबंधात्मक मोहीम राबविण्यात येणार असून नागरिकांनी सामाजिक जागरूकता दाखवित त्या परिसरात सार्वजनिक ठिकाणी पडलेले प्लास्टिक गोळा करण्यासाठी उपस्थित राहून स्वच्छता मोहीमेत सहभागी होत आपले संपूर्ण योगदान द्यावे असे आवाहन करण्यात येत आहे.
