स्वयं न्युज ब्युरो : 8369924646 / 8082097775
नवी मुंबई : राष्ट्रवादी काँग्रेस पक्ष, प्रभाग 85 आणि 86च्या वतीने दहावी आणि बारावी परिक्षेत नेत्रदिपक यश मिळविणार्या गुणवंत विद्यार्थ्यांचा तसेच त्यांच्या पालकांचा घरोघरी जावून सत्कार करण्यात आला. यावेळी प्रभाग 85च्या नगरसेविका सौ. सुजाताताई सुरज पाटील, प्रभाग 86च्या नगरसेविका सौ. जयश्री ठाकूर आणि राष्ट्रवादी काँग्र्रेसचे पदाधिकारी या गुणवंत सत्कार कार्यक्रमात सहभागी झाले होते.
यावेळी नेरूळ सेक्टर सहा आणि सारसोळे गावातील गुणवंत विद्यार्थ्यांचा सत्कार करताना प्रभाग 85च्या नगरसेविका सौ. सुजाताताई सुरज पाटील यांनी विद्यार्थ्यांशी हितगुज साधताना त्यांना पुढील वाटचालीसाठी शुभेच्छा दिल्या. नगरसेविका सुजाताताई पाटील यांनी स्वत: एम.कॉमपर्यत शिक्षण घेतले असल्याने दहावीच्या विद्यार्थ्यांना त्यांनी वाणिज्य शाखेतील बारकावे समजावून सांगताना पुढील संधीविषयी विस्तृत मार्गदर्शन केले. या यशाने विद्यार्थ्यांनी हुरळून न जाता जमिनीवर पाय ठेवत पुढील शैक्षणिक वाटचालीत आपल्या यशाचा आलेख कायम ठेवावा आणि आपल्या आई-वडीलांच्या तसेच गुरूजनांच्या आपल्याकडून असलेल्या अपेक्षा पूर्ण करण्याची विद्यार्थ्यांनी महत्वाकांक्षा बाळगावी असे आवाहन नगरसेविका सौ. सुजाताताई पाटील यांनी यावेळी केले.
