अत्याधुनिक कोल्ड स्टोरेज सुविधांचा शुभारंभ * अत्याधुनिक विमानतळाच्या बांधकामाला मंजुरी * ऐव्हिऐशन उद्योग क्षेत्रात मोठी गुंतवणूक
- टाटा उद्योग समुहातर्फे गुंतवणूकीस उत्सुकता * लॉजेस्टिक पार्कमुळे निर्यातीला प्रोत्साहन
नागपूर : डॉ. बाबसाहेब आंबेडकर आंतरराष्ट्रीय विमानतळ व कार्गो हबच्या अत्याधुनिक बांधकामाला शासनाने मान्यता दिली असून यामध्ये अद्यावत विमानतळ, कार्गो टर्मिनल, नविन रनवे तयार करतांना निर्यातीसाठी कोल्ड स्टोरेजची आवश्यकता लक्षात घेवून लॉजेस्टीक पार्क तयार करण्यात येणार असल्यामुळे देशातील निर्यातीसाठी मिहानला प्राधान्य राहणार असल्याचे प्रतिपादन, मुख्यमंत्री देवेंद्र फडणवीस यांनी केले.
डॉ. बाबासाहेब आंबेडकर आंतरराष्ट्रीय विमानतळाच्या परिसरात असलेल्या कार्गो इमारतीमध्ये यु.एस. एन्टरप्रायजेस या जागतिक लॉजेस्टीक कंपनीतर्फे निर्यातदारांसाठी कोल्ड स्टोरेजची सुविधा उपलब्ध करून देण्यात आलीअसून या सुविधेचे उद्घाटन मुख्यमंत्री देवेंद्र फडणवीस यांच्या हस्ते आज झाले त्याप्रसंगी मार्गदर्शन करतांना ते बोलत होते.
यावेळ पालकमंत्री चंद्रशेखर बावनकुळे, महापौर नंदाताई जिचकार, आमदार समीर मेघे, माजीमंत्री श्रीमती शोभाताई फडणवीस, मिहानचे व्यवस्थापकीय संचालक व अध्यक्ष सुरेश काकाणी विमानतळाचे संचालक एस. व्हि. मुळेकर, युएस एन्टरप्राजेसचे उल्हास मोहिले, प्रसाद वैशंपायन, अभिजीत फडणवीस यावेळी उपस्थित होते.
लॉजेस्टिक हबच्या माध्यमातून मोठ्या प्रमाणात निर्यात व्हावी यासाठी प्रोत्साहन देण्यात येत असल्याचे सांगतांना मुख्यमंत्री देवेंद्र फडणवीस म्हणाले की, देशात जीएसटी करप्रणाली लागू झाल्यानंतर नागपूर येथून मोठ्या प्रमाणात निर्यातीला प्राधान्य राहणार आहे. त्यादृष्टीने नागपूर आंतरराष्ट्रीय विमानतळाच्या बांधकामाला मंजूरी देण्यात आली असून बांधकामाच्या दृष्टीने आवश्यक प्रक्रिया सुरू झाली आहे. मिहानमध्ये येत्या काळात मोठी गुंतवणूक होत असल्याचे सांगतांना ते पुढे म्हणाले, ऐव्हीऐशन क्षेत्रात बोइंगएमआरओ, अंबानी ऐव्हिऐशन उद्योगांबरोबरच टाटा यांच्यासोबत चर्चा सुरू असून येत्या काळात मोठा प्रकल्प सुरू होण्याच्या दृष्टीन प्रयत्न असल्याचे त्यांनी सांगितले.
मिहान येथे रामदेव बाबा यांच्या फळप्रक्रिया उद्योगासोबतच इतरही उद्योगांनी येथे उद्योग सुरू करण्यासंबंधी मागणी केली आहे. फळप्रक्रिया उद्योगाच्या निर्यातीसाठी शितगृह साखळीची मागणी लक्षात घेवून ही सुविधा येथे उपलब्ध झाली आहे. भविष्यात यापेक्षा मोठे शितगृहाची आवश्यकता भासणार असल्याचे मुख्यमंत्री देवेंद्र फडणवीस यांनी यावेळी सांगितले.
प्रारंभी मुख्यमंत्री देवेंद्र फडणवीस यांनी दिपप्रज्वलीत करून शितगृहाचे उद्घाटन केले. आंतररारष्ट्रीय कार्गो इमारतीध्ये दोन मोठ्या शितगृहासाठी जागा उपलब्ध करून देण्यात आली असून शितगृहामधून मालवाहतूक विमानांच्या माध्यमातून थेट निर्यात करणे सुलभ होणार असल्यामुळे विमानतळावरच कोल्ड स्टोरेजची सुविधा निर्यातीला प्रोत्साहन देणारी ठरणार आहे. आंतरराष्ट्रीय लॉजेस्टिक क्षेत्रातील युएस एन्टरप्रायजेस यांनी दोन शितगृहाच्या माध्यमातून सुमारे 10 मेट्रीक टन साठवणूकीची सुविधा उपलब्ध करून दिली आहे. येथून नाशवंत वस्तूची सुध्दा हातळणी होणार असल्यामुळे निर्यातदारांना एकाच ठिकाणी सर्व सुविधा मिळणार आहे.
प्रारंभी युएस एन्टरप्रायजेसचे उल्हास मोहिले यांनी स्वागत करून कोल्ड स्टोरेज प्रकल्पा विषयी माहिती दिली. या प्रकल्पासाठी 16 लक्ष रूपयाची गुंतवणूक करण्यात आली असून निर्यातदारांची मागणीनुसार या सुविधांमध्ये वाढ करण्यात येणार असल्याचे त्यांनी सांगितले. यावेळी भाजपाचे जिल्हाध्यक्ष डॉ. राजीव पोद्दार, संजय भेंडे, युएस एन्टरप्रायजेसचे प्रशांत वैशंपायन, फेजर केसरवानी, श्रीमती किर्ती मोहिले, अभिजीत फडणवीस, विमानतळ प्राधिकरणाचे अबिद रुही, मिहानचे तांत्रिक संचालक एस.व्हि.चहांदे, एस.के.चॅटर्जी आदी उपस्थीत होते.
