महापालिका मुख्यालयाला दि.बा. पाटलांचे नाव देण्याची मागणी

मनोज मेहेर – सारसोळे
नवी मुंबई : पामबीच मार्गावर असलेल्या नवी मुंबई महापालिका मुख्यालयाला आगरी-कोळी समाजाचे श्रध्दास्थान असलेल्या दि.बा.पाटलांचे नाव देण्याची मागणी आगरी-कोळी युथ फाऊंडेशनने महापालिका आयुक्तांकडे एका लेखी निवेदनातून केली आहे.
पाच वेळा आमदार, दोन वेळा खासदार, विरोधी पक्षनेता असलेल्या दि.बा. पाटलांनी प्रकल्पग्रस्तांसाठी केलेले कार्य आगरी-कोळी समाजासाठी नेहमीच प्रेरणामय ठरले आहे. दि.बा.पाटलांच्या कार्यामुळे प्रकल्पग्रस्तांच्या समस्यांना शासन दरबारी न्याय भेटला आहे. नवी मुंबई शहराचा विकास हा प्रकल्पग्रस्तांच्या जमिनीवर व स्थानिकांच्या त्यागावर झालेला असल्याने याची कोठेतरी कृतज्ञता म्हणून प्रकल्पग्रस्तांसाठी भरीव कार्य करणार्‍या दि. बा. पाटलांचे नाव नवी मुंबई महापालिका मुख्यालयाला देण्याची मागणी आगरी-कोळी युथ फाऊंडेशनच्या वतीने शुक्रवारी (दि. 18 ऑगस्ट) महापालिका प्रशासनाकडे करण्यात आली आहे.