घणसोलीत श्री सदस्यांची स्वच्छता मोहिम

दीपक देशमुख
नवी मुंबई : गुरुवर्य नानासाहेब धर्माधिकारी प्रतिष्ठाण रेवदंडाच्या वतीने पद्मश्री दत्तात्रेय उर्फ आप्पासाहेब धर्माधिकारी यांच्या ७४ व्या वाढदिवसा निमित्त घणसोलीतील श्री सदस्यांनी पूर्ण घणसोली परिसरात स्वच्छता केली. या स्वच्छता मोहिमेत ५०० श्री सदस्यांनी सहभाग घेतला.
घणसोली परिसरातील रबाले, नोसील नाका,गोठीवली, तलवली, घणसोली नोड व घणसोली गावातील मोकळे भूखंड, रस्ते, स्वच्छता गृह शेजारील मोकळ्या जागा व ठाणे बेलापूर महामार्ग लगत मोकळ्या जागेवर पडलेला कचरा साफ केला. रविवारी सकाळी सात वाजता स्वच्छता मोहिमेला गटागटाने श्री सदस्यांनी एकत्र येऊन परिसर स्वच्छ केला. जमा केलेला कचरा मनपाच्या कचरा वाहतूक करणार्‍या वाहनामध्ये टाकण्यात आला.
गुरुवर्य आप्पासाहेब धर्माधिकारी यांच्या आदेशानुसार वर्ष भरात अशा प्रकारची देशहितवादी सामाजिक कार्यक्रम घेत असतात. त्यामध्ये जणजागरुतीपर कार्यक्रम, स्वच्छता मोहीम तसेच वृक्षांची रोपटी लागवड आदी कार्यक्रम घेत असते. त्याचाच एक भाग म्हणून आपल्या गुरूला वाढदिवस निमित्त एक भेट म्हणून स्वच्छता मोहीम राबविली असल्याची श्री सदस्य नरेश पाटील यांनी सांगितले.