नवी मुंबई : महानगरपालिका अतिक्रमण विभागाच्या वतीने महापालिका आयुक्त डॉ. रामास्वामी एन. यांच्या निर्देशानुसार अतिक्रमणे व अनधिकृत बांधकामावर आळा घालण्यात येत असून ऐरोली विभागात दिवागाव येथे अनधिकृत बांधकामावर धडक कारवाई करण्यात आली.
ऐरोली विभागांतर्गत दिवागाव, सेक्टर 9 मध्ये घर क्र. 362 येथे श्री. सहदेव मढवी यांच्यामार्फत नवी मुंबई महानगरपालिकेची कोणतेही पूर्व परवानगी न घेता अनधिकृतपणे तळमजळा + 3 मजल्याच्या इमारतीचे बांधकाम सुरू होते. या बांधकामास ऐरोली विभाग कार्यालयामार्फत महाराष्ट्र प्रादेशिक नियोजन व नगररचना अधिनियम, 1966 मधील कलम 54 अन्वये रितसर नोटीस बजावण्यात आलेली होती. त्यास अनुसरून श्री. सहदेव मढवी यांनी केलेले अनाधिकृत बांधकाम स्वत:हून हटविणे आवश्यक होते. परंतू त्यांनी सदर ठिकाणी अनाधिकृत बांधकाम सुरू ठेवले होते.
अतिरिक्त आयुक्त शहर श्री. रविंद्र पाटील यांच्या मार्गदर्शनाखाली, अतिक्रमण विभागाचे उपआयुक्त डॉ. अमरीश पटनिगीरे यांचे नियंत्रणानुसार, ऐरोली विभाग कार्यालयामार्फत सहा.आयुक्त श्री. अनंत जाधव व त्यांच्या अधिकारी-कर्मचारी यांनी या अनाधिकृत बांधकामाच्या निष्कासनाची धडक मोहिम हाती घेतली व हे अनाधिकृत बांधकाम निष्कासित करण्यात आले. या धडक मोहिमेसाठी 08 मजूर, 1 गॅस कटर, 2 ब्रेकर तसेच अतिक्रमण विभागाकडील पोलिस पथक तैनात होते.
नागरिकांनी कोणत्याही प्रकारचे बांधकाम करताना महानगरपालिकेच्या संबंधित विभागांची रितसर परवानगी घ्यावी असे आवाहन करतानाच अशाच प्रकारच्या अनधिकृत बांधकामे व अतिक्रमणविरोधी कारवाया यापुढील काळातही आणि प्रभावीपणे राबविल्या जाणार आहेत याची नोंद घ्यावी असे नवी मुंबई महानगरपालिकेकडून सूचित करण्यात येत आहे.
