कोरोना प्रसार रोखण्यासाठी लॉकडाऊन वाढविण्याचा निर्णय योग्य

गरज पडल्यास लॉकडाऊन ३० मे पर्यंत वाढवा
अॅड. महेश जाधव : स्वयंम न्युज ब्युरो : Navimumbailive.com

मुंबई :  कोरोनाचा प्रसार वाढत असून तो रोखण्यासाठी लॉक डाऊन १७ मे पर्यंत वाढविण्याचा  निर्णय योग्य आहे. लॉक डाऊन चे नियम लोकांनी पाळावेत. बाहेर गर्दी करू नये. गर्दी मुळे कोरोना चा प्रदूर्भाव  वाढत आहे. कोरोना ग्रस्तांची संख्या कमी झाली नाही तर १७ मेपर्यंतचा लॉक डाऊन वाढवून ३० मेपर्यंत करावा असे मत रिपब्लिकन पक्षाचे राष्ट्रीय अध्यक्ष केंद्रीय राज्यमंत्री ना रामदास आठवले यांनी व्यक्त केले.
कोरोना ने जगात थैमान घातले आहे. आतापर्यंत संपूर्ण जगात ३४ लाख लोक कोरोनाग्रस्त झाले आहेत.भारतात कोरोना ग्रस्तांची संख्या ३९ हजार एवढी झाली आहे. महाराष्ट्रात १२ हजार ५०० लोक कोरोना ग्रस्त झाले आहेत. जगात ‘गो कोरोना’चा आम्ही नारा दिला. मात्र कोरोना काही जात नाही. महाराष्ट्रात ५०० पेक्षा जास्त लोकांचा कोरोनामुळे मृत्यू झाला आहे. मात्र लॉकडाऊन वेळेवर केला नसता तर देशात लाखो लोकांचे कोरोनामुळे मृत्यू झाले असते. पंतप्रधान नरेंद्र मोदी यांनी २४ मार्च ते १४ एप्रिल लॉकडाऊन केले. त्यानंतर १४ एप्रिल ते ३ मेपर्यंत लॉकडाऊन केले आणि आता तिसऱ्यांदा १७ मेपर्यंत लॉक डाऊन वाढविला आहे. लॉकडाऊनमुळेच आपण कोरोनाला हरवू शकतो. लोकांनी घरी राहुन लॉकडाऊनचे नियम पाळावे; गर्दी टाळावी असे आवाहन रामदास आठवले यांनी केले आहे.  राज्यातील मुंबई ठाणे पुणे आदी शहरांतील मजुरांना त्यांच्या गावी जाण्याची योग्य सुविधा द्यावी; मजुरांना भोजन वाटप करावे. शाळांच्या प्रांगणात मंडप टाकुन त्यांना भोजन देण्याबाबत मुख्यमंत्री उद्धव ठाकरे यांनी लक्ष द्यावे, अशी सूचना रामदास आठवले यांनी केली आहे.