दिपक देशमुख :Navimumbailive.com@gmail.com
नवी मुंबई : कॉंग्रेस पक्षाच्या नेरूळ तालुका कार्यकारिणीकडून नेरूळ सेक्टर दोनमध्ये डासांच्या वाढत्या पार्श्वभूमीवर गृहनिर्माण सोसायटी आवारात मोफत धुरीकरणाचा कार्यक्रम राबविण्याचा कार्यक्रम सुरु झाल्याने स्थानिक रहीवाशांमध्ये समाधान व्यक्त केले जात आहे.
महापालिका प्रभाग ८४ मधील नेरूळ सेक्टर २ मधील एलआयजी वसाहत, घरकुल, आम्रपाली, वारणा, सविनय, जयहिंद या सर्व असोसिएशनमध्ये कॉंग्रेस पक्षाकडून मोफत धुरीकरणाचा कार्यक्रम राबविण्यात आला. कॉंग्रेस पक्षाच्या नवी मुंबई जिल्हा सचिव विद्या भांडेकर, वासंती पुजारी, तुषार पाटील, सुधीर पांचाळ यांनी ही मोहीम राबविण्यात पुढाकार घेतला. महापालिका अंर्तगत भागात फवारणी करत नसल्याने स्थानिक रहीवाशांना साथीच्या आजारांचा सामना करावा लागू नये म्हणून कॉंग्रेस पक्षाच्या या पदाधिकाऱ्यांनी धुरीकरणाची मशिन खरेदी करून मोफत धुरीकरण अभियानाचा शुभारंभ केला. स्थानिक कॉंग्रेस पदाधिकाऱ्यांकडे यापूर्वी दोन मोठ्या धुरीकरणाच्या मशिन असताना धुरीकरणाची व्याप्ती वाढविण्यासाठी आणखी छोट्या मशिनची खरेदी करून मोफत धुरीकरण अभियानाचा शुभारंभ केला असल्याची माहिती विद्या भांडेकर यांनी दिली.
महापालिका प्रशासनाकडे तक्रार करायची, मग त्यांनी वेळ मिळाल्यावर येवून फवारणी करायची यापेक्षा रहीवाशांनी थेट कॉंग्रेस पक्षाच्या कार्यकर्त्यांकडे व पदाधिकाऱ्यांकडे संपर्क करावा, तात्काळ धूरफवारणी करून दिली जाईल, असे आवाहन विद्या भांडेकर यांनी केले आहे.
