नवी मुंबई : जुलै महिना उजाडला तरी अजून पालिकेत काम करणाऱ्या मूषक नियत्रंण विभागात काम करणाऱ्या कामगारांचे मे व जून महिन्याचे वेतन झाले नसल्याने मूषक नियत्रंण कामगारांच्या वेतन विलंबाबाबत होणार अन्याय दूर करण्याची मागणी सानपाड्यातील भाजपा नेते पांडूरंग आमले यांनी महापालिका आयुक्त अण्णासाहेब मिसाळ यांच्याकडे केली आहे.
नवी मुंबई महानगरपालिका प्रशासनात गेल्या अनेक वर्षापासून मूषक नियत्रंण विभागात कंत्राटी कामगार मूषक नियत्रंणाचे आपले काम वर्षानुवर्षे इमानेइतबारे करत आहेत. कोरोना काळातही कॉलनी तसेच गावठाण परिसरात, गृहनिर्माण सोसायटीच्या आवारात, झोपडपट्टी परिसरातही आपला जीव धोक्यात घालून हे कामगार आजही काम करत आहेत. आज ७ जुलै. या कामगारांना मे व जून महिन्याचे वेतन मिळालेले नाही. गेल्या अनेक वर्षापासून या कामगारांची वेतन विलंबाबाबत ससेहोलपटच होत आहे. हे कामगार व त्यांचा परिवार कोरोनाने नाही पण आर्थिक कुपोषणाने नाही तर भूकबळीने मरण्याची भीती आहे. आपण याप्रकरणी लक्ष घालून संबंधित मूषक नियत्रंन कामगारांना न्याय मिळवून द्यावा, अशी मागणी पांडूरंग आमले यांनी केली आहे.
