घाटकोपर : घाटकोपर पश्चिम पारशिवाडी येथील जय महाराष्ट्र गणेश मैदान मनपा शाळा जवळील असलेला स्वातंत्र्यवीर विनायक दामोदर सावरकर यांचा फलक गेल्या काही महिन्यांपासून अडगळीत पडून आहे. यासंदर्भात मनसेचे वार्ड क्रमांक 129 चे शाखाध्यक्ष अरविंद गीते यांनी अनेकदा एन वार्ड पालिकेकडे फलकाच्या झालेल्या दुरावस्थे बाबत पत्रव्यवहार करून चौकाचे पुन्हा सुशोभीकरण करण्यात यावे अशी मागणी केली होती.
अधिक माहिती अशी आहे की 6 वर्षापूर्वी तत्कालीन नगरसेवक प्रवीण छेडा यांच्या पुढाकाराने स्वातंत्र्यवीर विनायक दामोदर सावरकर चौकाचे बृहन्मुंबई महानगर पालिकेच्या परवानगीने नामकरण करण्यात आले होते. काही वर्षानंतर पालिकेकडून लावण्यात आलेले दोन फलका पैकी एक फलक अज्ञाताकडून उखडून अडगळीत उलटा टाकण्यात आल्याने मनसेने याबाबत आपली नाराजी पालिकेकडे व्यक्त करत फलकाच्या सुशोभिकरणाची मागणी केली होती. यावेळी विभाग अध्यक्ष गणेश चुक्कल यांच्या मार्गदर्शनाखाली शाखाध्यक्ष अरविंद गीते यांच्या नेतृत्वाखाली आज एन वार्ड पालिकेतील परिमंडळ 1 चे सहायक अभियंता सचिन बबन बेलदार यांच्या दालसमोर कार्यकर्त्यानी स्वातंत्र्यवीराचे पोस्टर चिकटवून घोषणाबाजी केली. यावेळी पाऊण तास कार्यकर्त्यानी दालनाबाहेर ठिय्या आंदोलन केले. यावेळी उपविभाग अध्यक्ष निलेश जंगम , दत्ता पोखरकर आदी सह कार्यकर्ते उपस्थित होते. दरम्यान एन वार्ड परिमंडळ 1 चे सहायक अभियंता सचिन बेलदार यांची प्रतिक्रिया घेतली असता त्यांनी दोन दिवसात पारशिवाडी येथील सदर चौकाला भेट देऊन पाहणी करणार असल्याचे सांगितले.
