नवी मुंबई : सारसोळे शांतीधाम स्मशानभूमीत नेरूळ पूर्व आणि पश्चिम तसेच जुईनगर भागातील मृतदेह येत असल्याने स्मशानभूमीवर ताण पडत आहे. तसेच अंत्यविधीसाठी आलेल्या मृतदेहांनाही वेटींगचा सामना करावा लागत असल्याने महापालिका प्रशासनाने तातडीने नेरूळ पूर्वेला (फेज-1) स्मशानभूमी बनवावी अशी मागणी महापालिका ब प्रभाग समितीचे माजी सदस्य आणि कोलवाणी माता मित्र मंडळ , सारसोळे गावचे अध्यक्ष मनोज यशवंत मेहेर यांनी महापालिका आयुक्त अभिजित बांगर यांच्याकडे एका लेखी निवेदनातून केली आहे.
नेरूळ पूर्व आणि नेरूळ पश्चिम, जुईनगर भागातील मृतदेह अंत्यविधीसाठी नेरूळ सेक्टर 2-4 येथील सारसोळे शांतीधाम स्मशानभूमीत पूर्वीपासून येत आहेत. आता या भागातील लोकसंख्या वाढल्याने, परंतु महापालिका प्रशासनाकडून नव्याने स्मशानभूमीची निर्मिती न केल्याने सारसोळे शांतीधाम स्मशानभूमीवर ताण वाढू लागला आहे. त्यातच माजी नगरसेवक आपल्या राजकीय ताकदीचा व प्रतिष्ठेचा वापर करून नेरूळबाहेरील मृतदेह या स्मशानभूमीत अंत्यविधीसाठी आणू लागल्याने एकवर मृतदेहांना अंत्यविधीसाठी वेटींग करावी लागत आहे. नेरूळ पूर्वेकडील मृतदेहांवर अंत्यविधीसाठी त्याच ठिकाणी पालिका प्रशासनाने स्मशानभूमी बनविल्यास सारसोळे शांतीधाम स्मशानभूमीवर ताण वाढणार नाही. समस्येचे गांभीर्य ओळखून तातडीने नेरूळ पूर्व भागात स्मशानभूमी बनविण्यासाठी महापालिका प्रशासनाच्या संबंधितांना निर्देश देण्याची मागणी मनोज यशवंत मेहेर यांनी महापालिका प्रशासनाकडे केली आहे.
