Navimumbailive.com@gmail.com : ८३६९९२४६४६ – ९८२००९६५७३
नवी मुंबई : महाराष्ट्र प्रदेश कॉंग्रेसचे अध्यक्ष नाना पटोळे यांनी बुधवारी (दि. २ जुन) नवी मुंबईतील आपल्या दौऱ्यादरम्यान नेरूळ ब्लॉक कॉंग्रेसच्या जनसंपर्क कार्यालयास भेट दिली. यावेळी नवी मुंबई इंटकचे अध्यक्ष व नेरूळ ब्लॉक कॉंग्रेसचे अध्यक्ष रवींद्र सावंत यांच्या कार्याची प्रशंसा करत विविध आंदोलने, समस्यांचा पाठपुरावा यामुळे सावंत कॉंग्रेसला उभारी आणण्याचे महत्वपूर्ण काम करत असल्याचे नाना पटोळे यांनी सांगताना रवींद्र सावंत यांच्या कार्याला नकळत शाबासकी देण्याचे काम केले.
कॉंग्रेसचे प्रदेश अध्यक्ष नाना पटोळे यांनी नेरूळ ब्लॉक कॉंग्रेस कार्यालयास भेट दिली, त्यावेळी त्यांच्या समवेत महाराष्ट्र प्रदेश कॉंग्रेसच्या प्रवक्त्या लीना निमये, महाराष्ट्र प्रदेश कॉंग्रेसचे चिटणिस संतोष शेट्टी, तसेच नवी मुंबईचे माजी उपमहापौर रमाकांत म्हात्रे, नवी मुंबई कॉंग्रेसचे जिल्हाध्यक्ष अनिल कौशिक यांच्या माजी नगरसेविका मिरा पाटील, विजय कुरकुटे, प्रल्हाद गायकवाड, सुदर्शन सावंत, सुधीर पांचाळ, डॉ. नूरजॅहा उपस्थित होते.
यावेळी नाना पटोळे यांच्या हस्ते कॉंग्रेसचे नुकतेच वैकुंठवासी झालेले वॉर्ड अध्यक्ष सोमनाथ बारवे यांच्या परिवारास आर्थिक मदत करण्यात आली. नेरूळ तालुका ब्लॉक कॉंग्रेसचे अध्यक्ष रवींद्र सावंत व त्यांच्या सहकाऱ्यांनी हा निधी स्वखिशातून जमा केला असल्याने नाना पटोळे या उपक्रमाने प्रभावित झाले. मंत्रालयीन पातळीवर नवी मुंबईतील कामगारांच्या समस्या सोडविण्यासाठी सतत पाठपुरावा करत असल्याचे आपण जवळून पाहिल्याची माहिती नाना पटोळे यांनी यावेळी उपस्थित कॉंग्रेस पदाधिकाऱ्यांना दिली. या कार्यक्रमाचे नियोजनात कामगार नेते रवींद्र सावंत, नवी मुंबई कॉंग्रेसच्या जिल्हा सचिव विद्या भांडेकर व नेरूळ ब्लॉक कॉंग्रेसच्या पदाधिकाऱ्यांनी केले होते.
