नवी मुंबई : कोपरखैराणे सेक्टर २२,२३ मध्ये खाडीकिनारी उभ्या राहत असलेल्या टेम्पोमध्ये मृत कोंबड्या असतात. या मृत कोंबड्यांनी भरलेल्या टेम्पोमुळे कोपरखैराणेवासियांच्या आरोग्याला धोका निर्माण झाल्याचे सांगत भारतीय जनता युवा मोर्चाचे नवी मुंबई जिल्हा चिटणिस सुनिकेत हांडेपाटील महापालिकेच्या कोपरखैराणे विभाग अधिकारी कार्यालयात सहाय्यक आयुक्तांकडे लेखी तक्रार करत याप्रकरणी कारवाई करण्याची मागणी केली आहे.
कोपरखैराणे सेक्टर २२,२३ मध्ये खाडीकिनारी मृत कोंबड्यांनी भरलेले टेम्पो उभे असतात. यामुळे सभोवतालच्या परिसरातील रहिवाशांना नाहक दुर्गंधीचा सामना करावा लागतो. ही परिस्थिती आरोग्यास हानीकारक असून स्थानिकांना रोगराई उद्रेक होण्याची भीती आहे. येथे उभे असलेला टेम्पो हटवून तेथील परिसराची स्वच्छता करण्याची मागणी सुनिकेत हांडेपाटील यांनी महापालिका प्रशासनाकडे केली आहे.
