स्वयंम न्यूज ब्युरो : Navimumbailive.com@gmail.com : ८३६९९२४६४६
नवी दिल्ली : पंतप्रधान नरेंद्र मोदी यांनी शिवसेनेचे कल्याणचे खासदार डॉक्टर श्रीकांत शिंदे यांचा राष्ट्रीय लोकशाही आघाडीच्या बैठकीत पुन्हा एकदा ‘काय भाऊ’ म्हणून उल्लेख केल्याने डॉक्टर शिंदे यांना सुखद धक्का बसला आहे. यापूर्वी ऑपरेशन सिंदूरच्या परदेशी पाठवण्यात आलेल्या शिष्टमंडळात डॉक्टर श्रीकांत शिंदे यांचा समावेश करताना पंतप्रधान नरेंद्र मोदी यांनी श्रीकांत यांचा उल्लेख भाऊ असा केला होता त्यावेळी देखील श्रीकांत शिंदे यांना त्याचे कौतुक वाटले होते.
दिल्लीमध्ये जी.एम. सी बालयोगी सभागृहात राष्ट्रीय लोकशाही आघाडीची संयुक्त बैठक उपराष्ट्रपतीपदाच्या निवडणुकीच्या निमित्ताने आयोजित करण्यात आली होती. या बैठकीला भाजप आणि भाजपचे सर्व लोकशाही आघाडी मधील मित्रपक्ष यांचे खासदार उपस्थित होते. यावेळी उपराष्ट्रपती पदाचे उमेदवार महाराष्ट्राचे माजी राज्यपाल सी.पी. राधाकृष्णन यांचा शिवसेनेच्या वतीने खासदार डॉक्टर श्रीकांत शिंदे तसेच आयुष मंत्रालयाचे राज्यमंत्री प्रताप जाधव यांनी सत्कार केला. त्यांचा सत्कार करण्यासाठी आपल्या खुर्चीवरून उठल्यावर त्यांच्या दिशेने जात असताना पंतप्रधान नरेंद्र मोदी यांनी डॉक्टर श्रीकांत शिंदे यांना पुन्हा एकदा ‘काय भाऊ’ अशी हाक मारली. डॉक्टर श्रीकांत शिंदे यांनी देखील स्मितहास्य करत पंतप्रधानांनी संबोधलेल्या भाऊ उपाधीला मनापासून दाद दिली. श्रीकांत शिंदे यांना पंतप्रधानांनी दुसऱ्यांदा भाऊ संबोधल्याची चर्चा त्यानंतर राष्ट्रीय लोकशाही आघाडीच्या खासदारांमध्ये सुरू होती.
शिवसेनेचे खासदार तसेच उपमुख्यमंत्री एकनाथ शिंदे यांचे सुपुत्र म्हणून डॉक्टर श्रीकांत शिंदे यांच्या बाबत दिल्लीतील राजकीय वर्तुळात आकर्षण आहे. कल्याण लोकसभा मतदारसंघातून ते सलग तीन टर्म मोठ्या मताधिक्याने शिवसेना-भाजपा राष्ट्रवादी महायुतीचे खासदार म्हणून निवडून येत आहेत. कल्याण लोकसभा मतदार संघामध्ये विकास कामांसाठी मोठ्या प्रमाणावर विकास निधी उपलब्ध करून देत या मतदारसंघाचा चेहरा मोहरा बदलण्याचा सर्वंकष प्रयत्न खासदार श्रीकांत शिंदे हे सातत्याने करत आहेत.
पंतप्रधान नरेंद्र मोदी यांच्या नेतृत्वाखालील केंद्र सरकारने ऑपरेशन सिंदूरच्या माहितीसाठी परदेशी पाठवलेल्या सर्वपक्षीय खासदारांच्या शिष्टमडळात खासदार डॉक्टर श्रीकांत शिंदे यांच्यावर महत्त्वाची आणि मोठी जबाबदारी सोपवण्यात आली होती. खासदार शिंदे यांनी देखील त्यांच्यावर सोपवण्यात आलेल्या जबाबदारीला पूर्णपणे न्याय देत भारत सरकारची भूमिका आंतरराष्ट्रीय व्यासपीठावर अत्यंत प्रभावीपणे आणि जोरदारपणे मांडण्याचे काम केले. त्यावेळी देखील त्यांच्या या धडाकेबाज कामाची पोचपावती म्हणून पंतप्रधान नरेंद्र मोदी यांनी पहिल्यांदा खासदार श्रीकांत शिंदे यांचा उल्लेख भाऊ म्हणून केला होता. तेव्हापासून श्रीकांत शिंदे हे शिवसेना भाजप तसेच महायुतीच्या वर्तुळात भाऊ या नावानेच अधिक संबोधले जाऊ लागले आहेत.
