नवी मुंबई : नेरूळ सेक्टर सहामधील नेरूळ सिवह्यू उद्यानात स्वच्छता ठेवायची नसेल तर डम्पिंग ग्राऊंड जाहीर करण्याची लेखी मागणी राष्ट्रवादी कॉंग्रेस पक्षाचे शरद पवार गट जिल्हा उपाध्यक्ष महादेव पवार यांनी महापालिका आयुक्त कैलाश शिंदे यांच्याकडे एका लेखी निवेदनातून केली आहे.
सर्वप्रथम आम्ही आपणास नेरूळ सेक्टर सहामधील जनतेच्या व सारसोळे गावच्या ग्रामस्थांच्या वतीने नेरूळ सेक्टर सहामध्ये असणाऱ्या सुश्रुषा रुग्णालयासमोरील बाजूस असलेल्या नेरूळ सिव्ह्यू उद्यान पाहणी अभियानाकरीता निमंत्रित करत आहोत. आपण अचानक न सांगता भेट दिल्यास आपणास आमच्या म्हणण्यामागील गांभीर्य, कळकळ व तळमळ समजून येईल. या उद्यानाच्या प्रवेशद्वारालगतच पालिका कर्मचाऱ्यांकडून बाराही महिने कचऱ्याचे ढिगारे लावलेले पहावयास मिळतात. या दुर्गंधीचा पदपथावरुन ये-जा करणाऱ्या नागरिकांना व बाजूच्या सिव्ह्यु सोसायटीतील रहिवाशांना त्रास सहन करावा लागत आहे. या कचऱ्यामुळे रात्रीच्या वेळी डासांचा उद्रेक झालेला स्पष्टपणे दिसून येतो. या उद्यानाच्या सुशोभीकरणासाठी महापालिका प्रशासनाने आजवर खर्च खुप केला आहे. पण त्याचा उपयोग काय झाला? हा प्रश्न स्थानिक रहीवाशांना पडला आहे. परिसरातील दहा नागरिकही त्या उद्यानात जात नाही. उद्यानात कोणत्याही सुविधा नाही. मग उद्यानासाठी निधी कोठे वापरला? त्याचा काय उपयोग झाला? याचा महापालिकेने शोध घेणे आवश्यक असल्याचे महादेव पवार यांनी निवेदनात म्हटले आहे.
आपण पालिकेवर प्रशासक आहात. नवी मुंबई शहराची जबाबदारी आपणाकडे आहे. कचऱ्याचे ढिगारे हटविल्यास व त्या उद्यानात कचरा न साठविल्यास दुर्गंधीचा व डासांचा त्रास होणार नाही. आपण स्वत: या उद्यानाला भेट देवून उद्यान स्थानिक रहिवाशांना वापरण्यायोग्य बनविण्याचे आणि उद्यानाच्या प्रवेशद्वारावर असलेले कचऱ्याचे ढिगारे हटविण्याचे संबंधितांना निर्देश देण्याची मागणी महादेव पवार यांनी महापालिका आयुक्तांकडे केली आहे.
