नवी मुंबई : नवी मुंबई जिल्हा कॉंग्रेसच्या वतीने नेरूळ-जुईनगर परिसरात दिवाळीच्या सुट्टीनिमित्त मुलांसाठी गडकिल्ले स्पर्धा व महिलांसाठी आयोजित केलेल्या स्पर्धेमध्ये गडकिल्ले स्पर्धेत शिवकृप्पा किल्ला ग्रुपने तर रांगोळी स्पर्धेमध्ये वैष्णवी कुटाळे यांनी प्रथम क्रमांक पटकाविला आहे. इंटकचे नवी मुंबई अध्यक्ष व नवी मुंबई जिल्हा कॉंग्रेसचे प्रवक्ते रविंद्र सावंत आणि नवी मुंबई जिल्हा कॉंग्रेसच्या सचिव विद्या भांडेकर यांनी या स्पर्धेचे आयोजन केले होते.
गडकिल्ले स्पर्धेत शिवकृप्पा किल्ल्यास ३ हजार ५०० रुपयांचे पहिले बक्षिस, संभाजी ग्रुपला २ हजार ५०० रुपयांचे दुसरे बक्षिस, १ हजार ५०० रुपयांचे तिसरे बक्षिस किल्ले रायगडला मिळाले. रांगोळी स्पर्धेत वैष्णवी कुटाळे यांना पाच हजार रुपयांचे प्रथम बक्षिस, महेश बल्लु यांना गॅस शेगडी असलेले दुसरे बक्षिस तर महादेव हारे यांना तिसरे बक्षिस मिळाले. पुनम साळुंखे, संगीता अमराळे, मानसी लंबे, स्नेहल पाटील, साक्षी तनपुरे, संचिता सावंत, पूजा कार केली यांना उत्तेजनार्थ बक्षिसे देण्यात आली. रांगोळी स्पर्धेत एक हजार ३०० लोकांनी भाग घेतला, गडकिल्ले सानपाडा, जुईनगर, नेरूळ सेक्टर २ मधील बऱ्याच सोसायटीतील मुलांनी सहभाग घेतला.
नेरूळ सेक्टर दोनमधील श्रीदत्तात्रेय सोसायटीमधील कॉंग्रेसच्या मध्यवर्ती कार्यालयात या स्पर्धेचा पारितोषिक वितरण कार्यक्रम आयोजित करण्यात आला होता. या कार्यक्रमास आयोजक रविंद्र सावंत व विद्या भांडेकर यांच्यासह कॉंग्रेसचे जुईनगर विभाग अध्यक्ष महानंद रामराजे, ओमकार सोसायटीचे अनिल कदम, जुईनगर सानपाडा सेक्टर १०, नेरूळ सेक्टर २ मधील महिला व मुले तसेच स्थानिक रहिवाशी उपस्थित होते.
