नवी मुंबई : महापालिका प्रशासनातील कंत्राटी विभागातील सफाई कर्मचाऱ्यांना दिवाळी संपली तरी बोनस (सानुग्रह अनुदान) न मिळाल्याच्या प्रकाराची चौकशी करुन संबंधित कर्मचाऱ्यांना न्याय देण्याची मागणी नवी मुंबई लाईव्ह.कॉमच्या संपादक सौ. सुवर्णा खांडगेपाटील यांनी महापालिका आयुक्त कैलाश शिंदे यांच्याकडे एका लेखी निवेदनातून केली आहे.
दिवाळी संपून दहा दिवस लोटले तरी महापालिका प्रशासनात काम करणाऱ्या कंत्राटी संवर्गातील सफाई कर्मचाऱ्यांना दिवाळीच्या पार्श्वभूमीवर मिळणारा बोनस (सानुग्रह अनुदान) अजूनही मिळालेले नाही. स्वमालकीचे धरण असणाऱ्या व महाराष्ट्रात सधन म्हणून गणल्या जाणाऱ्या नवी मुंबई महापालिकेला ही बाब भूषणावह नाही. दिवाळी संपल्यावरही सफाई कर्मचाऱ्यांना ठेकेदाराकडून बोनस मिळालेला नाही, बोनस न मिळालेल्या कर्मचाऱ्यांची संख्या प्रचंड आहे. नेरूळमधील अनेक सफाई कामगार आजही बोनसपासून वंचित आहेत. महापालिका प्रशासनाकडून कंत्राटी कर्मचाऱ्यांची बॅंक खाती तपासल्यास आजही मोठ्या संख्येने कर्मचाऱ्यांना बोनस (सानुग्रह अनुदान) मिळाला नसल्याचे दिसून येईल. सफाई कर्मचाऱ्यांनी ठेकेदाराकडे बोनसबाबत विचारणा केल्यास, पालिकेकडून अजून बिल मिळाले नाही, तुम्हाला जे करायचे ते करा अशी उर्मटपणे उत्तरे ठेकेदाराकडून देण्यात येत आहे. पालिका प्रशासनाने दिवाळी लक्षात घेता कंत्राटी कर्मचाऱ्यांना बोनस तातडीने देणे आवश्यक होते. जर पालिकेने कंत्राटी कर्मचाऱ्यांना बोनस दिला असेल व ठेकेदारांने कामगारांना बोनस न देता इतरत्र वळविला असेल तर यामुळेही प्रशासनाची प्रतिमा मलीन होण्याची भीती आहे. बोनसबाबत प्रशासन विभागाकडून खातरजमा करुन घ्यावी. सफाई कर्मचाऱ्याच्या किती ठेकेदारांची बिले देण्यात आलेली नाहीत याचीही खातरजमा करुन घ्यावी. याबाबत पालिका प्रशासनाने लेखी स्पष्टीकरण जाहीर करणे आवश्यक आहे. या प्रकरणाचे गांभीर्य लक्षात घेऊन सफाई कर्मचाऱ्यांच्या ठेकेदारांकडून कर्मचाऱ्यांना दिवाळी संपल्यावरही बोनस न मिळालेल्या प्रकरणाची चौकशी करावी. ज्याची बोनसबाबत बिले दिली नसतील ती तातडीने वितरीत करावी व ज्या ठेकेदारांना दिवाळीची बिले देवूनही त्यांनी कामगारांना बोनस दिला नसेल तर त्या ठेकेदारावर गु्न्हा दाखल करुन त्याला काळ्या यादीत टाकावे व पुन्हा महापालिकेचा कोणताही ठेका त्या ठेकेदाराला देवू नये. दिवाळी बोनसपासून वंचित असणाऱ्या सफाई कर्मचाऱ्यांना लवकरात लवकर बोनस मिळण्यासाठी तातडीने कार्यवाही करण्याची मागणी सुवर्णा खांडगेपाटील यांनी महापालिका आयुक्तांकडे केली आहे.
