नेरूळ सेक्टर 16 व 16ए मध्ये उपआरोग्य केंद्र सुरु करण्याची भाजपची मागणी

नवी मुंबई : नेरूळ सेक्टर 16 मधील छत्रपती संभाजीराजे उद्यान व 16 ए प्लॉट 122 ए गणपती गल्ली मार्ग येथील महापालिकेच्या उद्यानात उपआरोग्य केंद्र (ओपीडी सेवा) सुरु करण्याची लेखी मागणी भाजपच्या माजी नगरसेविका सौ. रुपाली किसमत भगत आणि भाजपचे माजी जिल्हा पदाधिकारी गणेश भगत यांनी कुकशेत नागरी आरोग्य केंद्राच्या आरोग्य अधिकाऱ्यांकडे केली आहे.
नेरूळ सेक्टर 16, 16 ए हा परिसर पामबीच मार्गालगतचा परिसर असून मार्गालगतच खाडीकिनारा आहे. यामुळे या परिसरात डासांच्या उद्रेकामुळे बाराही महिने साथीचे रुग्ण पहावयास मिळतात. येथील रहिवाशांना पालिकेच्या आरोग्य सेवेच्या सुविधांसाठी एकतर नेरूळ गाव अथवा कुकशेत गाव येथे जावे लागते. एकतर पायपीट करावी लागते अथवा रिक्षाचा खर्च करावा लागतो. त्यामुळे या नागरी आरोग्य केंद्रावरही ताण पडतो. त्यामुळे सेक्टर 16 मधील छत्रपती संभाजीराजे उद्यान व 16 ए मधील 122 ए, गणपती गल्ली मार्ग महापालिकेच्या उद्यानामध्ये उपआरोग्य केंद्र (ओपीडी सेवा) सुरु करणे आवश्यक आहे. स्थानिक जनतेची तशी मागणीही आहे. संबंधित ठिकाणी उपआरोग्य केंद्र (ओपीडी सेवा) सुरु करण्याची मागणी सौ. रुपाली भगत आणि गणेश भगत यांनी स्वतंत्रपणे निवेदनातून केली आहे.