नवी मुंबई : विधानसभा निवडणुकीमध्ये महायुतीला मिळालेल्या विक्रमी यशामध्ये राज्यातील महिलांचा वाटा निर्णायक ठरला आहे. निवडणुकीअगोदर ‘मुख्यमंत्री लाडकी बहीण योजना’ सुरु करुन महिलांना प्रति महिना दीड हजार रुपये मदत करुन महिला वर्गाचा जनाधार पूर्णपणे महायुतीकडे वळाला. तथापि भाजपच्या बेलापुरच्या महिला आमदार सौ. मंदाताई म्हात्रे यांना तिकिट वाटपात डावलले गेल्याने जे भाजपातील लाडक्या बहीणींना न्याय देवू शकत नाही, ते राज्यातील अन्य लाडक्या बहीणींना काय न्याय देणार, असा संतप्त सूर नवी मुंबईतील महिला वर्गाकडून आळविण्यात येत आहे. तिकिट वाटपात मंदाताई म्हात्रेंना विश्वासात न घेणे, त्यांच्या समर्थकांना एकही तिकिट न देणे, १३ कोरे एबी फॉर्म देवून त्यांच्यासह त्यांच्या कार्यकर्त्यांची झालेली फसवणूक यामुळे नवी मुंबईतील सुशिक्षित वर्गात, विशेषत: महिला वर्गांमध्ये, युवतीमध्ये भाजपाप्रती संतापाची व नाराजीची लाट निर्माण झाली असून भाजपला पालिका निवडणुकीत याचा फटका बसण्याची शक्यता निर्माण झाली आहे.
मंदाताई म्हात्रे २०१४ पासून भाजपत कार्यरत असून सलग तीन वेळा बेलापूर विधानसभा मतदारसंघातून त्या विजयी झाल्या आहेत. कोणतीही राजकीय पार्श्वभूमी नसताना मंदाताई म्हात्रे हे नेतृत्व स्वबळावर नावारुपाला आले असल्याचा अभिमान नवी मुंबईतील महिलांच्या बोलण्यातून व्यक्त होत आहे. सलग तीन वेळा निवडून आलेल्या महिला आमदाराला तिकिट वाटपात मिळालेली वागणूक नवी मुंबईतील सुशिक्षित महिला वर्गात, युवतींमध्ये चर्चेचा विषय झाला आहे. महिला आमदाराला १३ एबी फॉर्म कोरे देवून त्यांच्यासह त्यांच्या कार्यकर्त्यांना उमेदवारी देताना झुलवत ठेवण्याचा संतापजनक प्रकार नवी मुंबईसह ठाणे जिल्ह्यामध्ये चर्चेचा विषय बनला आहे. महिला आमदाराला कोणत्याही निवड प्रक्रियेत विश्वासात घेण्यात आले नाही. ज्या कार्यकर्त्यांनी, पदाधिकाऱ्यांनी विधानसभा निवडणुकीत भाजपचा आमदार निवडून आणण्यासाठी परिश्रम घेतले, त्या कार्यकर्त्यांना तिकिट वाटपात डावलून ज्यांनी भाजपचा पराभव करण्यासाठी बेलापुर विधानसभा मतदारसंघात परिश्रम घेतले, त्यांनाच तिकिट देण्यात आले आहे. मोदी-शहा-फडणवीसांना हीच भाजप बेलापुर मतदारसंघात घडवायची आहे. विरोधात काम करणाऱ्यांना न्याय मिळत असेल तर भाजपसाठी काम करुन फायदा काय, असा संतप्त सुर भाजपच्या वर्तुळात आळविला जात आहे.
