नवी मुंबई : तब्बल साडे दहा वर्षांनी होत असलेल्या नवी मुंबई महापालिकेच्या सार्वत्रिक निवडणुकीत सत्तेसाठी खऱ्या अर्थांने शिवसेना-भाजपतच खरी लढाई होत आहे. तिकिटवाटपामध्ये आमदार मंदा म्हात्रे गटाला डावलत गणेश नाईक गटाने एकहाती वर्चस्व मिळविले असले तरी सत्ता मिळविण्यासाठी व महापौर बसविण्यासाठी नाईक गटाची प्रतिष्ठा पणाला लागली आहे. शिवसेना शिंदे गट नवी मुंबईत कमालीचा प्रभावी असून त्यातच नाराजांचा गट, आमदार मंदाताई म्हात्रेंचे तिकिट वाटपात डावलले गेलेले रथी-महारथी यामुळे भाजपची सत्तेच्या दिशेने होणारी वाटचाल खडतर बनली आहे. नेरूळ नोडमधील प्रभाग २३ मध्ये शिवसेना-भाजपमध्येच कॉंटे की टक्कर पहावयास मिळणार आहे.
प्रभाग २३ मधून शिवसेनेच्या वतीने महिला राखीव गटातून माजी नगरसेविका सौ. सुनिता रतन मांडवे, खुल्या गटातून उच्चशिक्षित सौ. आश्विनी मते-म्हसे, पुरुष खुल्या गटातून दिलीप घोडेकर व महादेव पवार निवडणूक रिंगणात आहेत. भाजपमधून पुरुष खुल्या गटातून सुरज पाटील, प्रदीप गवस, महिला राखीव गटातून सौ. सुजाताताई सुरज पाटील, महिला खुल्या गटातून सौ. रुपाली किसमत भगत निवडणूक रिंगणात आहेत. राष्ट्रवादी अजित पवार गटाकडून तिडके, पोमण, घोलप तर महाविकास आघाडीकडून परशूराम मेहेर, अजय सुपेकर, तानाजी जाधव, सौ. रोहिणी शिंदे, सौ. शालिनी म्हात्रे तर शिवसेना उबाठा गटामध्ये तात्या या नावाने सर्वांना परिचित असणारे शिवाजी महाडीक मनसेकडून निवडणूक रिंगणात आहेत.
प्रभाग २३ मध्ये पुरुष खुल्या गटामध्ये सुरज पाटील आणि महादेव पवार तर महिला राखीव गटामध्ये सौ. सुजाताताई पाटील आणि सौ. सुनिता रतन मांडवे या दोन लढती लक्षवेधी ठरणार आहेत. घोडेकर-गवस अशी एका गटात लढत असली तरी या गटात अनेक उमेदवार उभे असल्याने मतविभागणीचा फटका कोणाला बसणार आणि कोणाला फायदा झाला, हे मतमोजणीनंतरच स्पष्ट होणार आहे. या प्रभागामध्ये १५ ते १८ टक्के सारसोळे गाव व कुकशेत गावातील मतदान असून उर्वरित मतदान सेक्टर ६,८,१०,१६, १६ अ या कॉलनी परिसरातील मतदान आहे. शिवसेनेकडून निवडणूक रिंगणात असलेले चारही उमेदवार कॉलनी परिसरातील असून भाजपकडील चारपैकी तीन उमेदवार ग्रामस्थ आहेत. महाविकास आघाडीकडून दोन उमेदवार ग्रामस्थ आहेत. सुरज पाटील व गणेश भगत यांचा कॉलनी परिसरातील जनसंपर्क प्रभावी असला तरी निवडणूकीच्या शेवटच्या टप्प्यापर्यत हा प्रभाव टिकून राहणे भाजपसाठी आवश्यक आहे. शिवसेनेकडे रतन मांडवे, दिलीप घोडेकर, विजय माने, महादेव पवार ही चौकडी असल्याने शिवसेनेचेही पारडे जड झाले आहे. या प्रभागातील लढतीकडे बेलापुर मतदारसंघाचे लक्ष लागले असून कोणासही ही लढत सोपी नसल्याचे प्रचाराच्या पहिल्या टप्प्यातच स्पष्ट झाले आहे.
