नवी मुंबई : नेरूळ सेक्टर सहामधील राजमाता जिजाऊ उद्यानात सुरु असलेल्या कामाबाबत माहिती देण्याची मागणी सामाजिक कार्यकर्ते संदीप खांडगेपाटील यांनी महापालिका आयुक्त कैलाश शिंदे यांच्याकडे एका लेखी निवेदनातून केली आहे.
नेरूळ सेक्टर सहामधील सिडको वसाहतीमध्ये महापालिकेचे राजमाता जिजाऊ उद्यान आहे. या उद्यानात आज सकाळपासून खेळण्याच्या समोरील बाजूस छोटेखानी गवत लावण्याचे काम सुरु आहे. काम सुरु असताना उद्यानात सफाईचे काम करणारा कर्मचारी व अन्य कर्मचारी उपस्थित असल्याचे पहावयास मिळाले. उद्यानाच्या आतील व बाहेरील बाजूस फेरफटका मारला असता कोठेही कामाबाबतचा फलक दिसून आलेला नाही. नेरूळमध्ये अनेक विकासकामे फलक न लावताच होत असतात. त्यामुळे नेमके कामाचे स्वरुप काय आहे, मुदत काय आहे, निधी किती खर्च होणार आहे, याचा काहीही उलगडा होत नाही. आपण उद्यानात सुरु असलेल्या कामाबाबत चौकशीचे निर्देश देवून आम्हास माहिती उपलब्ध करुन द्यावी व काम करत असलेल्या ठेकेदाराला माहिती फलक लावण्याचे निर्देश देण्याची मागणी संदीप खांडगेपाटील यांनी महापालिका आयुक्तांकडे केली आहे.
