नवी मुंबई : नेरूळ सेक्टर सहामध्ये विक्रम बारलगतचा महावितरण उपकेंद्र (डीपी) ते सिडकोची शिवम सोसायटी (प्लॉट १५) दरम्यान पदपथालगत महावितरणने विद्युत केबल्स टाकण्यासाठी जेसीपीच्या मदतीने केलेल्या रस्त्याचे खोदकामाच्या जागेवर तात्काळ डांबरीकरण करण्यासाठी संबंधितांना निर्देश देण्याची मागणी सामाजिक कार्यकर्ते संदीप खांडगेपाटील यांनी महापालिका आयुक्त कैलाश शिंदे यांच्याकडे एका लेखी निवेदनातून केली आहे.
महावितरणने नेरूळ सेक्टर सहामध्ये विक्रम बारलगतचा महावितरण उपकेंद्र (डीपी) ते सिडकोची शिवम सोसायटी (प्लॉट १५) दरम्यान पदपथालगत महावितरणने विद्युत केबल्स टाकण्यासाठी जेसीपीच्या मदतीने मोठ्या प्रमाणावर रस्त्याचे खोदकाम केलेले आहे. या कामासाठी महावितरणने महापालिका प्रशासनाकडे लेखी अर्ज केलेला आहे का, महापालिका प्रशासनाने त्यास परवानगी दिली आहे, त्यासाठी आवश्यक शुल्काचा त्यांनी भरणा केला आहे का याबाबत चौकशी करावी. विनापरवानगी खोदकाम केले असेल तर महावितरणवर महापालिका प्रशासनाने गुन्हा दाखल करावा. या खोदकामामुळे रस्त्याची दु्र्दशा झाली आहे. परिसराला बकालपणा आला असून या अंर्तगत रस्त्यावर स्थानिक रहिवाशांची व वाहनांची मोठ्या प्रमाणावर वर्दळ असते. आजही काम सुरुच आहे. या ठिकाणी झालेले खोदकाम काही ठिकाणी बुजविण्यात आले असले तरी या रस्त्याला कच्च्या रस्त्याचे स्वरुप आलेले आहे. महापालिका प्रशासनातील संबंधितांना या रस्त्यावर तातडीने डांबरीकरण करण्याचे निर्देश देण्याची मागणी संदीप खांडगेपाटील यांनी केली आहे.