स्वयंम न्यूज ब्युरो : Navimumbailive.com@gmail.com
नवी मुंबई : महापालिकेच्या मलेरिया विभागात कंत्राटी कामगार म्हणून कार्यरत असलेले विवेक सावंत (वय ३२) याचा ब्रेन स्ट्रोकमुळे मृत्यू झाल्याची दुर्दैवी घटना समोर आली आहे. आरोग्य विमा किंवा त्याची सुविधा नसल्याने उपचारांसाठी त्यांच्या कुटुंबाला धावपळ करावी लागली. त्यांच्या पश्चात पत्नी, १२ महिन्यांची मुलगी, आई-वडील आणि लहान भाऊ असा परिवार आहे. आई-वडील गावाकडे मजुरी करून उदरनिर्वाह करतात. शहरातील महागड्या उपचारांमुळे कुटुंबावर आर्थिक संकट कोसळले आहे.
विवेकची अचानक प्रकृती बिघडल्याने महानगरपालिका रुग्णालयात दाखल करण्यात आले. सीटी स्कॅनमध्ये त्याला ब्रेन स्ट्रोक झाल्याचे स्पष्ट झाले. डॉक्टरांनी तातडीने मुंबईतील मोठ्या रुग्णालयात हलविण्याचा सल्ला दिला. नातेवाइकांनी फोर्टिस रुग्णालयात रेफर करण्याची विनंती केली; मात्र कंत्राटी कर्मचाऱ्यांना अशी सुविधा उपलब्ध नसल्याचे सांगण्यात आले. त्यानंतर कामगार नेते रवींद्र सावंत यांनी पुढाकार घेत त्यांना वाशी येथील न्यूएरा रुग्णालयात दाखल केले. मात्र मोठा खर्च करूनही विवेक सावंत यांचे प्राण वाचवता आले नाहीत.
महाराष्ट्र कर्मचारी युनियनचे अध्यक्ष रवींद्र सावंत यांनी कंत्राटी कामगारांना किमान पाच लाख रुपयांचा तरी मेडिक्लेम देण्याची मागणी केली आहे. सध्या कंत्राटी कर्मचाऱ्यांना ना ईएसआयची सुविधा आहे, ना महानगरपालिकेकडून आरोग्य विमा दिला जातो. त्यामुळे अशा घटनांमध्ये कामगार कुटुंबीयांना आर्थिक मदतीसाठी इतरांकडे हात पसरावे लागत असल्याची खंत त्यांनी व्यक्त केली. महानगरपालिकेने कंत्राटी कामगारांसाठी मेडिक्लेमबाबत समिती स्थापन केली असली तरी अद्याप ठोस निर्णय झालेला नाही. त्यामुळे “आणखी किती कामगारांना विम्याविना जीव गमवावा लागणार?” असा प्रश्न उपस्थित होत आहे.