नवी मुंबई : कोपरखैराणे सेक्टर १६,१७,२२,२३ येथील महावितरणच्या विद्युत उपकेंद्राच्या इमारतीची तात्काळ दुरुस्ती करण्याची मागणी सामाजिक कार्यकर्ते सुनिकेत हांडेपाटील यांनी महावितरणच्या सहाय्यक अभियंत्यांकडे लेखी निवेदनातून केली आहे.
कोपरखैराणे सेक्टर १६, १७, २२ व २३ येथील महावितरणच्या विद्युत उपकेंद्राची इमारत सध्या अतिशय खराब व जीर्ण अवस्थेत आहे. इमारतीच्या भिंतींना तडे गेलेले असून काही ठिकाणी सिमेंट व प्लास्टर निघालेले आहे. तसेच संरचनेची स्थिती असुरक्षित वाटत असून भविष्यात अपघात होण्याची शक्यता भीती सुनिकेत हांडेपाटील यांनी निवेदनात व्यक्त केली आहे.
सदर उपकेंद्रातून परिसरातील नागरिकांना नियमित वीजपुरवठा केला जातो. त्यामुळे या इमारतीची सुरक्षितता व मजबुती अत्यंत महत्त्वाची आहे. कोणताही अनुचित प्रसंग टाळण्यासाठी तसेच कर्मचारी व नागरिकांच्या सुरक्षेच्या दृष्टीने उपकेंद्राची तात्काळ तपासणी करून आवश्यक ती दुरुस्ती करण्याची मागणी सुनिकेत हांडेपाटील यांनी केली आहे.
