नवी मुंबई : नेरूळ सेक्टर आठमधील राजर्षी छत्रपती शाहू महाराज उद्यानात असलेल्या सार्वजनिक शौचालय तसेच आणि भारतरत्न डॉ. बाबासाहेब आंबेडकर पादचारी पुलाच्या बाजूलाही महापालिकेचे सार्वजनिक शौचालयाच्या नुतनीकरणाच्या कामास सुरुवात करुन असुविधांचे तातडीने निवारण करण्याची लेखी मागणी युवा सेनेचे नवी मुंबई जिल्हा सरचिटणिस निखील रतन मांडवे यांनी महापालिकेच्या कार्यकारी अभियंत्यांकडे एका निवेदनातून केली आहे.
नेरूळ सेक्टर आठमध्ये राजर्षी छत्रपती शाहू महाराज उद्यानात महापालिकेचे सार्वजनिक शौचालय आहे. शौचालयातील असलेली शौचाची भांडी तुटलेली आहेत. शौचालयात असलेल्या शॉवरमधून पाणी येत नाही. शौचालयाला दुरावस्था आली असून स्वच्छतेचा अभाव आहे. स्थानिक रहिवाशांना दुर्गंधीचा त्रास सहन करावा लागत आहे. या समस्यांचे निवारण करण्यासाठी माजी नगरसेविका सौ. सुनिता रतन मांडवे यांच्या पाठपुराव्यानुसार व मागणीनुसार शौचालयाच्या नुतनीकरण कामाची महापालिका प्रशासनाने नोव्हेंबर २०२५ मध्ये निविदा काढली होती. याला चार महिन्याचा कालावधी लोटला तरी पालिका प्रशासनाकडून कोणत्याही प्रकारची कार्यवाही झालेली नाही. या शौचालयाच्या दुरावस्थेमुळे परिसराला बकालपणा आला असून तातडीने या कामाला सुरुवात होणे आवश्यक असल्याचे निखील रतन मांडवे यांनी निवेदनात म्हटले आहे.
भारतरत्न डॉ. बाबासाहेब आंबेडकर पादचारी पुलाच्या बाजूलाही महापालिकेचे सार्वजनिक शौचालय आहे. हे शौचालय पूर्णपणे खराब झाले असून नागरिकांना दुर्गंधीचा सामना करावा लागत आहे. शौचालयातील समस्यांमुळे परिसराला बकालपणा आला आहे. येथील समस्यांचे निवारण करण्यासाठी शौचालयाच्या नुतनीकरणासाठी सप्टेंबर २०२५ ला महापालिका प्रशासनाने निविदा काढली होती. या कामाला सहा महिन्याचा कालावधी लोटला तरी कामास सुरुवात झालेली नाही.
नेरूळ सेक्टर आठ परिसरातील राजर्षी छत्रपती शाहू महाराज उद्यानात असलेले सार्वजनिक शौचालय आणि भारतरत्न डॉ. बाबासाहेब आंबेडकर पादचारी पुलाच्या बाजूला असलेले महापालिकेचे सार्वजनिक शौचालय याच्या नुतनीकरणाच्या कामास तातडीने सुरुवात करण्यासाठी संबंधितांना निर्देश देण्याची मागणी निखील मांडवे यांनी महापालिका प्रशासनाकडे केली आहे.
