नवी मुंबई : बेलापुर विधानसभा मतदारसंघातील पावसाळीपूर्व कामांचा आढावा घेण्याची लेखी मागणी अखिल भारतीय माथाडी संघटनेचे नवी मुंबई जिल्हा अध्यक्ष पांडुरंग आमले यांनी महापालिका आयुक्त कैलास शिंदे यांच्याकडे एका लेखी निवेदनातून केली आहे.
राज्यात शुक्रवारीच (दि. २२ मे) ग्रामीण व शहरी भागात अवकाळी पावसाचा तडाखा बसलेला आहे. पावसाळ्यापूर्वी नवी मुंबई महापालिका प्रशासनाकडून पावसाळीपूर्व कामे केली जातात. वृक्षछाटणी, फांद्यांची छाटणी, रस्त्यांची बाह्य व अंर्तगत रस्त्यांची डागडूजी, पथदिव्यांची दुरुस्ती, पावसाळी गटारांची सफाई, नाल्यांची सफाई व अन्य कामे यामध्ये केली जातात. आपण विभाग अधिकाऱ्यांनी दिलेल्या माहितीवर विसंबून न राहता बेलापूर विधानसभा मतदारसंघात पाहणी अभियान राबवून पावसाळीपूर्व कामे किती झाली आहेत, याचा आढावा घ्यावा. पावसाळा कालावधीत कोणती समस्या निर्माण झाल्यास त्या त्या क्षेत्रातील विभाग अधिकाऱ्यांवर महापालिका प्रशासनाकडून प्रशासकीय कारवाई करावी. अजून आठवडा बाकी आहे. पावसाळीपूर्व कामे बाकी असतील तर गती द्यावी. आपण स्वत: पाहणी अभियान राबविल्यास आपणास कामांचा अंदाज येईल, असे पांडुरंग आमले यांनी निवेदनात म्हटले आहे.
बेलापुर विधानसभा मतदारसंघातील पावसाळीपूर्व कामांचा आढावा घेण्याची मागणी
