एक महिन्याच्या आत प्रलंबित रकमा देण्याची शिवसैनिक महादेव पवार यांची मागणी
अनंतकुमार गवई : Navimumbailive.com@gmail.com
नवी मुंबई : नवी मुंबई महापालिकेच्या सभागृहांचे व समाज मंदिरांचे डिपॉझिट (अनामत रक्कम) मिळण्यासाठी सर्वसामान्य नागरिकांना ७ ते १० महिने वाट पाहावी लागत असून, यामुळे जनतेला मोठा मानसिक व आर्थिक त्रास सहन करावा लागत आहे. या गंभीर समस्येवर शिवसैनिक महादेव पवार यांनी थेट मनपा आयुक्त कैलास शिंदे यांना पत्र लिहून सर्व प्रलंबित डिपॉझिट्स तात्काळ परत करण्याची मागणी केली आहे.
शहरातील ‘अहिल्याबाई होळकर सभागृहा’सह इतर सर्वच हॉलचे डिपॉझिट अडकल्याने नागरिक महापालिका कार्यालयाचे उंबरठे झिजवत आहेत. यावर कायमस्वरूपी तोडगा काढण्यासाठी, ‘कोणत्याही मनपा सभागृहाचे डिपॉझिट कार्यक्रम संपल्यापासून ३० दिवसांच्या (१ महिन्याच्या) आत नागरिकांच्या बँक खात्यात जमा झालेच पाहिजे’ असा कडक लेखी आदेश आयुक्तांनी काढावा, अशी आग्रहाची मागणी महादेव पवार यांनी पत्राद्वारे केली आहे. आयुक्त यावर काय निर्णय घेतात, याकडे आता नागरिकांचे लक्ष लागले आहे.
