पावसाळ्यात संभाव्य दुर्घटना टाळण्यासाठी आयुक्तांकडे रविंद्र सावंत यांची मागणी
अनंतकुमार गवई : Navimumbailive.com@gmail.com
नवी मुंबई : नेरूळ सेक्टर ४ परिसरातील सिडकोच्या गृहनिर्माण सोसायट्यांमधील रस्त्यावर झुकलेल्या व ठिसूळ झालेल्या झाडांच्या फांद्यांची तातडीने छाटणी करून संभाव्य जीवित व वित्तहानी टाळावी, अशी मागणी शिवा पाम सोसायटीचे रहिवासी रविंद्र सावंत यांनी नवी मुंबई महापालिका आयुक्त डॉ. कैलास शिंदे यांच्याकडे निवेदनाद्वारे केली आहे.
निवेदनात म्हटले आहे की, नेरूळ सेक्टर ४ मधील बहुतांश सिडकोच्या गृहनिर्माण सोसायट्यांमध्ये रहिवाशांनी सुमारे अडीच दशकांपूर्वी वृक्षारोपण केले होते. कालांतराने ही झाडे मोठी झाली असून त्यांच्या अनेक फांद्या सोसायटीच्या आवाराबाहेर रस्त्याच्या दिशेने झुकल्या आहेत. सोसायटीच्या आवारातील फांद्यांची छाटणी रहिवासी स्वतः करतात; मात्र रस्त्याच्या दिशेने उंच वाढलेल्या फांद्यांची छाटणी करणे त्यांच्या आवाक्याबाहेर आहे.
या धोकादायक व ठिसूळ फांद्या पावसाळ्यात जोरदार वारा किंवा मुसळधार पावसामुळे तुटून रस्त्यावर किंवा वाहनांवर कोसळण्याचा धोका निर्माण झाला आहे. नुकतेच शिवा पाम सोसायटी परिसरात एक मोठे झाड रस्त्यावर कोसळल्याने काही काळ वाहतूक विस्कळीत झाली असून वाहनांचेही नुकसान झाल्याचे निवेदनात नमूद करण्यात आले आहे.
या पार्श्वभूमीवर महापालिकेने तातडीने सर्वेक्षण करून नेरूळ सेक्टर ४ मधील रस्त्यांवर झुकलेल्या तसेच धोकादायक स्थितीतील झाडांच्या फांद्यांची छाटणी करावी. तसेच संभाव्य अपघात टाळण्यासाठी आवश्यक त्या प्रतिबंधात्मक उपाययोजना तातडीने राबवाव्यात, अशी मागणी रविंद्र सावंत यांनी आयुक्तांकडे केली आहे.