महसूल शिबिरातून १,६४१ लाभार्थ्यांना सेवांचा लाभ
जयेश खांडगेपाटील : Navimumbailive.com@gmail.com
जुन्नर : ओझर (ता. जुन्नर) येथे आयोजित छत्रपती शिवाजी महाराज महसूल समाधान शिबिरात एकूण १,६४१ लाभार्थ्यांना विविध शासकीय योजनांचा लाभ देण्यात आला. जिल्हाधिकारी जितेंद्र डूडी यांच्या मार्गदर्शनाखाली शुक्रवारी (ता. ३१ जुलै) आयोजित या शिबिरात तालुक्यातील विविध शासकीय विभागांनी नागरिकांना एकाच ठिकाणी सेवा उपलब्ध करून दिली, अशी माहिती तहसीलदार रणजीत भोसले यांनी दिली.
शिबिराचे उद्घाटन उपविभागीय अधिकारी अर्चना तांबे यांच्या हस्ते झाले. या शिबिरात महसूल, सामाजिक न्याय, शिक्षण, कृषी, परिवहन आदी विविध विभागांचे २२ माहिती व सेवा स्टॉल उभारण्यात आले होते. नागरिकांना वृद्धापकाळ, विधवा व अपंग पेन्शन योजनांसह उत्पन्न दाखला, जात प्रमाणपत्र, आधार लिंकिंग आदी विविध सेवांचा लाभ देण्यात आला.
यावेळी उपविभागीय अधिकारी अर्चना तांबे, तहसीलदार रणजीत भोसले आणि उपविभागीय पोलीस अधिकारी धनंजय पाटील यांनी उपस्थित नागरिकांशी संवाद साधत शासनाच्या विविध लोककल्याणकारी योजनांची माहिती दिली. तसेच, तालुक्यातील शिष्यवृत्तीस पात्र ठरलेल्या विद्यार्थ्यांसह त्यांना मार्गदर्शन करणाऱ्या शिक्षकांचा प्रमाणपत्र देऊन गौरव करण्यात आला.
कार्यक्रमास मुख्याधिकारी डॉ. चरण कोल्हे, गटशिक्षणाधिकारी अशोक लांडे, सहायक निबंधक डॉ. गजेंद्र देशमुख, एसटी महामंडळाचे आगार व्यवस्थापक वसंत अरगडे, तालुका कृषी अधिकारी गणेश भोसले, नायब तहसीलदार सचिन मुंढे, संतोष भुजबळ, तुषार कोरडे यांच्यासह विविध विभागांचे अधिकारी, ग्राम महसूल अधिकारी, ग्रामपंचायत अधिकारी व कर्मचारी उपस्थित होते. शिबिराला नागरिकांचा उत्स्फूर्त प्रतिसाद लाभला.
