ईद-ए-मिलादच्या महफिलसाठी प्रशासनाची ‘विशेष’ तयारी हवी!

वाशीत २५ ऑगस्टला भव्य महफिल-ए-मिलाद

वाहतूक कोंडी टाळण्यासाठी पार्किंग, पोलिस बंदोबस्त आणि स्वच्छतेचे नियोजन करण्याची हाजी शाहनवाज खान यांची मागणी

श्रीकांत पिंगळे : Navimumbailive.com@gmail.com

नवी मुंबई : ईद-ए-मिलादुन्नबी निमित्त दावते इस्लामी इंडिया यांच्या वतीने मंगळवार, २५ ऑगस्ट रोजी वाशी सेक्टर ३० येथील सिडको प्रदर्शन केंद्रात भव्य महफिल-ए-मिलादचे आयोजन करण्यात आले आहे. या कार्यक्रमाला मोठ्या संख्येने भाविक आणि नागरिक उपस्थित राहण्याची शक्यता असल्याने वाहतूक कोंडी, पार्किंगची समस्या तसेच कायदा-सुव्यवस्थेचा प्रश्न निर्माण होऊ नये, यासाठी नवी मुंबई प्रशासनाने आतापासूनच विशेष नियोजन करावे, अशी मागणी ऑल इंडिया उलमा बोर्डच्या महाराष्ट्र कोअर कमिटीचे कोकण विभाग व गोवा प्रभारी हाजी शाहनवाज खान यांनी केली आहे.

महफिल-ए-मिलादच्या पार्श्वभूमीवर नवी मुंबई पोलीस, वाहतूक विभाग, नवी मुंबई महानगरपालिका आणि संबंधित प्रशासकीय यंत्रणांकडे विशेष व्यवस्थांची मागणी करण्यात आली आहे. कार्यक्रमस्थळी येणाऱ्या नागरिकांची संख्या लक्षात घेता वाहनतळासाठी स्वतंत्र आणि पुरेशी व्यवस्था करावी. वाहने रस्त्यावर अस्ताव्यस्त उभी राहणार नाहीत, यासाठी वाहतूक पोलिसांनी योग्य नियोजन करावे, अशी मागणी खान यांनी केली आहे.

वाहतूक कोंडी टाळण्यासाठी विशेष नियोजन

वाशी परिसरात मोठ्या प्रमाणात नागरिकांची गर्दी होण्याची शक्यता असल्याने कार्यक्रमाच्या वेळेत वाहतूक कोंडी होऊ नये, यासाठी वाहतूक पोलिसांनी आवश्यक त्या ठिकाणी अतिरिक्त मनुष्यबळ तैनात करावे. वाहनांची ये-जा सुरळीत ठेवण्यासाठी पर्यायी मार्ग, प्रवेश-निर्गमन व्यवस्था आणि आवश्यक त्या ठिकाणी वाहतूक नियंत्रणाचे नियोजन करावे, अशी मागणी करण्यात आली आहे.

स्वच्छता आणि नागरी सुविधांवरही भर

मोठ्या संख्येने नागरिक एकत्र येणार असल्याने कार्यक्रमस्थळ तसेच परिसरात स्वच्छता राखणे अत्यंत आवश्यक आहे. महापालिकेने कार्यक्रमापूर्वी आणि कार्यक्रमाच्या दिवशी विशेष स्वच्छता मोहीम राबवावी. पुरेशी स्वच्छतागृहे, पिण्याच्या पाण्याची व्यवस्था आणि कचरा संकलनासाठी स्वतंत्र यंत्रणा उपलब्ध करून द्यावी. कार्यक्रमादरम्यान निर्माण होणाऱ्या कचऱ्याची तातडीने विल्हेवाट लावावी, अशी मागणी हाजी शाहनवाज खान यांनी केली आहे.

कायदा-सुव्यवस्थेसाठी पोलिस बंदोबस्त

कार्यक्रमाला होणारी संभाव्य गर्दी लक्षात घेता नवी मुंबई पोलिसांनी पुरेसा बंदोबस्त तैनात करावा. गर्दीचे नियोजन, वाहनांची ये-जा आणि कार्यक्रमस्थळी शांतता व शिस्त कायम ठेवण्यासाठी पोलिसांनी आयोजकांशी समन्वय साधावा, अशीही मागणी करण्यात आली आहे.

शांतता, बंधुभावाचा संदेश

ईद-ए-मिलादुन्नबी  हा प्रेम, बंधुभाव, शांतता, शिस्त आणि मानवतेचा संदेश देणारा पवित्र दिवस आहे. त्यामुळे हा कार्यक्रम शांततापूर्ण आणि शिस्तबद्ध वातावरणात पार पडावा, यासाठी आयोजकांकडून प्रशासनाला पूर्ण सहकार्य केले जाईल, असे हाजी शाहनवाज खान यांनी स्पष्ट केले.

नवी मुंबई पोलीस, वाहतूक विभाग, महापालिका आणि संबंधित प्रशासकीय यंत्रणांनी परस्पर समन्वयातून कार्यक्रमासाठी आवश्यक व्यवस्था करावी. प्रशासनाच्या सहकार्याने महफिल-ए-मिलादचा कार्यक्रम शांततेत, सुव्यवस्थित आणि आदर्श पद्धतीने पार पडेल, असा विश्वास हाजी शाहनवाज खान यांनी व्यक्त केला आहे.