७२९ कोटींच्या कचरा प्रकल्पावर ‘मर्सिडीज’चा आरोप!

शिवसेना प्रवक्ते व  नगरसेवक अंकुश कदम यांचा सभागृह नेते व माजी महापौर सागर नाईक यांच्यावर गंभीर दावा; चौकशीची मागणी

तेजल मोराजकर : Navimumbailive.com@gmail.com

नवी मुंबई : तुर्भे येथील बहुचर्चित वेस्ट-टू-एनर्जी प्रकल्पावरून नवी मुंबईच्या राजकारणात पुन्हा खळबळ उडाली आहे. ७२९ कोटींच्या प्रकल्पाशी संबंधित कंपनीकडून भाजपचे सभागृहनेते व नवी मुंबईचे माजी महापौर सागर नाईक यांना सुमारे दीड कोटींची मर्सिडीज भेट देण्यात आल्याचा गंभीर आरोप शिवसेना प्रवक्ते व नवी मुंबई महापालिकेतील स्वीकृत नगरसेवक अंकुश कदम यांनी केला आहे. या कथित व्यवहाराची स्वतंत्र चौकशी करण्याची मागणी करत कदम यांनी समर्थकांसह महापालिका मुख्यालयात आंदोलन केले.

तुर्भे येथील एकात्मिक घनकचरा व्यवस्थापन प्रकल्पाची एकूण किंमत सुमारे २,१०० कोटी असून पहिल्या टप्प्यात ९१० कोटींचे बायोगॅस आणि वेस्ट-टू-इलेक्ट्रिसिटी प्रकल्प प्रस्तावित आहेत. यातील ₹७२९ कोटींची गुंतवणूक खासगी सवलतधारक R & B Greentech LLP करणार असल्याची अधिकृत प्रकल्प माहिती उपलब्ध आहे. प्रकल्पाची क्षमता टप्प्याटप्प्याने वाढवून दररोज १,५०० टन कचऱ्यावर प्रक्रिया करण्याचे नियोजन असून सुमारे २७ मेगावॅट वीज निर्मितीचे उद्दिष्ट आहे.

याच प्रकल्पाचा संदर्भ देत कदम यांनी R & B Greentechशी संबंधित उपकंपनीच्या माध्यमातून सागर नाईक यांना दीड कोटींची मर्सिडीज भेट देण्यात आल्याचा दावा केला आहे. वाहनाची खरेदी, मालकी, संबंधित कंपन्यांमधील आर्थिक व्यवहार आणि लोकप्रतिनिधींशी असलेले कथित संबंध यांची कागदपत्रांसह चौकशी करावी, अशी मागणी त्यांनी केली.

‘जनतेच्या पैशाच्या प्रकल्पात पारदर्शकता हवी’

कोट्यवधी रुपयांच्या सार्वजनिक प्रकल्पाशी संबंधित व्यक्ती आणि सत्ताधारी लोकप्रतिनिधी यांच्यात आर्थिक अथवा वैयक्तिक हितसंबंध असल्याचा आरोप होत असेल, तर त्याची सत्यता जनतेसमोर येणे आवश्यक आहे, अशी भूमिका कदम यांनी मांडली. प्रशासनाने या आरोपांची निष्पक्ष चौकशी करून सत्य बाहेर आणावे, अशी मागणीही त्यांनी केली.

दरम्यान, मर्सिडीज भेटीचा आरोप कदम यांनी केला असला तरी त्याची स्वतंत्र पुष्टी उपलब्ध झालेली नाही. सागर नाईक, R & B Greentech LLP किंवा महापालिका प्रशासनाची या आरोपांवरील अधिकृत भूमिका समोर आल्यानंतरच या दाव्याची सत्यता स्पष्ट होणार आहे.

तुर्भे प्रकल्प आधीच कचरा व्यवस्थापन, पर्यावरण आणि प्रकल्पाच्या अंमलबजावणीवरून चर्चेत असताना आता ‘मर्सिडीज’च्या आरोपाने त्याला राजकीय रंग चढला आहे. त्यामुळे कदम यांच्या आरोपांवर सागर नाईक काय उत्तर देतात आणि प्रशासन चौकशीचे पाऊल उचलते का, याकडे नवी मुंबईचे लक्ष लागले आहे.