श्रीकांत पिंगळे : Navimumbailive.com@gmail.com
अंधेरी येथे मंत्री नितेश राणे यांच्या उपस्थितीत भव्य कावड यात्रा
मुंबई : हिंदू रक्षक सेनेच्या वतीने अंधेरी येथे आज भव्य कावड यात्रेचे आयोजन करण्यात आले. या यात्रेला हिंदुत्ववादी नेते तथा मंत्री नितेश राणे यांची प्रमुख उपस्थिती होती. यावेळी आमदार मुरजी पटेल, आचार्य पवन त्रिपाठी यांच्यासह हजारो शिवभक्त सहभागी झाले.
शेर-ए-पंजाब हॉटेल, अंधेरी येथून सुरू झालेल्या या कावड यात्रेचा बाबुलनाथ मंदिर येथे भक्तिमय वातावरणात समारोप होणार आहे. हजारो शिवभक्तांनी उत्स्फूर्त सहभाग घेत भगवान शंकराचे दर्शन घेतले. ‘हर हर महादेव’, ‘जय श्रीराम’ आणि ‘शंभो शंभो’च्या जयघोषाने संपूर्ण परिसर दुमदुमून गेला.
यावेळी उपस्थितांना संबोधित करताना मंत्री नितेश राणे यांनी हिंदू सण आणि परंपरा मोठ्या उत्साहात साजरे करण्याचे आवाहन केले. काही वर्षांपूर्वी कावड यात्रा छोट्या स्वरूपात आयोजित केली जात होती. मात्र, आता हिंदू रक्षक सेनेने ही यात्रा भव्य स्वरूपात आयोजित करण्याचा निर्णय घेतला आहे. “हा देश हिंदू राष्ट्र आहे आणि मुंबई-महाराष्ट्र ही महादेवाची भूमी आहे. त्यामुळे हिंदूंचा प्रत्येक सण मोठ्या उत्साहात आणि भव्य स्वरूपात साजरा झाला पाहिजे,” असे नितेश राणे यांनी सांगितले.
“ही हिंदुत्ववादी विचारांची सरकार आहे. आपण येथे सण साजरे करणार नाही, तर काय पाकिस्तानमध्ये जाऊन साजरे करणार?” असा सवालही त्यांनी केला.
“आज सर्व भगवाधारी सत्तेत आणि मंत्रालयात आहेत. मुंबईत ‘I LOVE मोहम्मद’ नाही, तर ‘I LOVE महादेव’च चालेल,” असेही नितेश राणे यांनी ठामपणे सांगितले.
