जिल्हाध्यक्ष अश्वजित जगताप यांचे रबाले पोलिसांना निवेदन
श्रीकांत पिंगळे : Navimumbailive.com@gmail.com
नवी मुंबई : सेक्टर १९, ऐरोली येथील मेहता महाविद्यालयाच्या परिसरात आरएसएसचे युवा संमेलन आयोजित करण्यात येणार असल्याची माहिती मिळाल्यानंतर वंचित बहुजन आघाडी नवी मुंबईचे जिल्हाध्यक्ष अश्वजीत जगताप यांनी तत्परतेने याबाबत भूमिका घेतली.
जिल्हाध्यक्ष अश्वजीत जगताप यांनी संबंधित महाविद्यालयाच्या मुख्याध्यापकांशी संपर्क साधून कार्यक्रमाबाबत विचारणा केली. यावेळी महाविद्यालय प्रशासनाने स्पष्ट केले की, महाविद्यालयाचा हॉल भाड्याने देण्यात येतो. तसेच या कार्यक्रमामध्ये महाविद्यालयातील शिक्षक किंवा विद्यार्थ्यांचा कोणताही सहभाग राहणार नसल्याचे प्रशासनाने सांगितले.
या पार्श्वभूमीवर महाविद्यालयाच्या परिसरात अशा प्रकारचे कार्यक्रम आयोजित करण्यात येऊ नयेत, महाविद्यालयातील विद्यार्थी किंवा इतर व्यक्तींची आरएसएस संघटनेमध्ये सभासद नोंदणी अथवा बळजबरीने सभासद नोंदणी करण्यात येऊ नये, तसेच कार्यक्रमामुळे कायदा व सुव्यवस्थेचा प्रश्न निर्माण होऊ नये, या मागण्यांसाठी वंचित बहुजन आघाडीच्या वतीने रबाळे पोलीस ठाण्याचे वरिष्ठ पोलीस निरीक्षक बाळकृष्ण सावंत यांना निवेदन देण्यात आले. यावेळी वंचित बहुजन आघाडीचे नवी मुंबई महासचिव मल्लिनाथ सोनकांबळे उपस्थित होते.
