जुन्नरकर वृत्तसेवा : Navimumbailive.com@gmail.com

२६ सप्टेंबरपासून ज्युनिअर वर्ल्ड सिरीज

सात देश, पाच वयोगटांत युवा क्रिकेटपटूंची विश्ववर्चस्वासाठी झुंज

प्रिटोरिया, दक्षिण आफ्रिका : युवा इनडोअर क्रिकेटपटूंच्या कौशल्याला जागतिक व्यासपीठ देणारी वर्ल्ड इनडोअर क्रिकेट फेडरेशनची ज्युनिअर वर्ल्ड सिरीज २०२६ येत्या २६ सप्टेंबरपासून दक्षिण आफ्रिकेतील प्रिटोरिया येथे रंगणार आहे. २६ सप्टेंबर ते ३ ऑक्टोबरदरम्यान होणाऱ्या या स्पर्धेत भारतासह ऑस्ट्रेलिया, इंग्लंड, न्यूझीलंड, दक्षिण आफ्रिका, श्रीलंका आणि यूएई या सात देशांचे संघ सहभागी होणार आहेत.

इनडोअर क्रिकेट साऊथ आफ्रिकेच्या आयोजनातून आणि वर्ल्ड इनडोअर क्रिकेट फेडरेशनच्या मान्यतेने होणारी ही स्पर्धा यू-प्रो ॲटरबरी ॲक्शन स्पोर्ट्स एरिना येथे होणार आहे. सात देशांतील युवा खेळाडूंना एकाच व्यासपीठावर आपले कौशल्य सिद्ध करण्याची संधी मिळणार असल्याने स्पर्धेकडे क्रीडाविश्वाचे लक्ष लागले आहे.

पाच वयोगटांत विश्ववर्चस्वाची लढाई

स्पर्धेत १३ वर्षांखालील मुलांचा, तसेच १५ आणि १७ वर्षांखालील मुला-मुलींच्या गटांचा समावेश आहे. त्यामुळे विविध वयोगटातील युवा खेळाडूंना आंतरराष्ट्रीय स्तरावर खेळण्याचा आणि स्वतःला सिद्ध करण्याचा मोठा अनुभव मिळणार आहे.

ऑस्ट्रेलिया, न्यूझीलंड, इंग्लंड आणि दक्षिण आफ्रिका या इनडोअर क्रिकेटमधील बलाढ्य संघांसमोर भारतीय युवा खेळाडूंच्या कामगिरीची खरी कसोटी लागणार आहे. वेगवान निर्णयक्षमता, सांघिक खेळ, रणनीती आणि दबावाच्या परिस्थितीत कामगिरी करण्याची क्षमता या स्पर्धेत निर्णायक ठरणार आहे.

भारतीय युवा खेळाडूंकडे नजरा

जागतिक स्पर्धेसाठी भारतीय संघात स्थान मिळवणे हीच मोठी कामगिरी असली तरी प्रिटोरियातील मैदानावर होणारी कामगिरीच पुढील वाटचाल निश्चित करणार आहे. आंतरराष्ट्रीय स्तरावरील हा अनुभव भारतीय युवा खेळाडूंच्या भविष्यातील कारकिर्दीसाठी महत्त्वाचा टप्पा ठरण्याची शक्यता आहे.

“सात देश, पाच वयोगट आणि आठ दिवसांचा थरार; प्रिटोरियात पुढच्या पिढीतील इनडोअर क्रिकेटपटूंच्या क्षमतेची खरी परीक्षा होणार आहे,” असे भारतीय आयआयएसएफचे अध्यक्ष सेट्रिक जो, सेक्रेटरी प्रसन्ना कुमार, चेअरमन अजय नाईक आणि माजी सेक्रेटरी मिलिंद पुंजा यांनी सांगितले.

२६ सप्टेंबरला प्रिटोरियात विश्वकपाचा थरार सुरू होताच, भारतीय युवा खेळाडू जागतिक इनडोअर क्रिकेटच्या मैदानावर आपल्या प्रतिभेची छाप उमटविण्यासाठी सज्ज होणार आहेत.