महाराष्ट्रातील विविध क्षेत्रांतील कर्तृत्ववान महिलांना एकत्र आणणारे व्यासपीठ
स्वयंम न्यूज ब्युरो : Navimumbailive.com@gmail.com
तळोजा : महिलांच्या कर्तृत्वाला व्यासपीठ मिळवून देण्यासाठी तसेच महिला सक्षमीकरण, सामाजिक संवाद आणि विचारांची देवाणघेवाण घडवून आणण्यासाठी ‘ऑल महाराष्ट्र वुमेन्स कॉन्फरन्स २०२६’चे आयोजन करण्यात आले आहे. ही विशेष महिला परिषद १० ऑक्टोबर रोजी तळोजा फेज-१, रायगड येथे होणार आहे.
ऑल इंडिया वुमेन बोर्ड – महाराष्ट्र कोअर कमिटी आणि कोकण डिव्हिजन यांच्या संयुक्त विद्यमाने या परिषदेचे आयोजन करण्यात आले आहे. महाराष्ट्रातील विविध क्षेत्रांत उल्लेखनीय कामगिरी करणाऱ्या आणि समाजासाठी मोलाचे योगदान देणाऱ्या महिलांना या परिषदेत एकत्र आणण्यात येणार आहे.
या परिषदेत डॉक्टर्स, शिक्षक व प्राचार्य, व्यावसायिक, उद्योजिका, सामाजिक कार्यकर्त्या, महिला सक्षमीकरणासाठी कार्यरत असलेल्या कार्यकर्त्या, शिक्षणतज्ज्ञ तसेच विविध क्षेत्रांतील कर्तृत्ववान महिला सहभागी होणार आहेत.
परिषदेदरम्यान गटचर्चा, संवाद सत्रे, अनुभवांची देवाणघेवाण, विचारमंथन आणि सामाजिक संवाद यांसारखे विविध उपक्रम आयोजित करण्यात येणार आहेत. महाराष्ट्रासह नवी मुंबई, रायगड, रत्नागिरी आणि संपूर्ण कोकण विभागातील महिलांना एकत्र आणून त्यांच्या अनुभवांना आणि विचारांना व्यासपीठ उपलब्ध करून देणे हा या परिषदेचा प्रमुख उद्देश आहे.
विविध व्यवसाय, सामाजिक क्षेत्र आणि पार्श्वभूमी असलेल्या महिलांनी एकत्र येऊन आपल्या कार्याचा अनुभव मांडावा, एकमेकींच्या विचारांची देवाणघेवाण करावी आणि पुढील पिढीतील महिलांना प्रेरणा मिळावी, या उद्देशाने ही परिषद आयोजित करण्यात आली आहे.
ऑल इंडिया वुमेन बोर्डच्या महाराष्ट्र कोअर कमिटी व शूरा कोअर कमिटीच्या प्रभारी तसेच कोकण विभागाच्या गोवा प्रभारी यांच्या मार्गदर्शनाखाली या परिषदेचे आयोजन करण्यात येत आहे.
महिलांच्या कर्तृत्वाचा गौरव करण्यासोबतच त्यांना परस्पर संवाद, विचारविनिमय आणि सामाजिक सहभागासाठी एक व्यापक व्यासपीठ मिळवून देणारी ही परिषद ठरणार असल्याचा दावा हाजी शाहनवाज खान यांनी केला आहे.
