जुन्नर तालुक्यात नानासाहेब धर्माधिकारी प्रतिष्ठानचा निर्माल्य संकलनाचा स्तुत्य उपक्रम
जयेश खांडगेपाटील : Navimumbailive.com@gmail.com
जुन्नर : गणेश विसर्जनानंतर नदीपात्रात टाकण्यात येणाऱ्या निर्माल्यामुळे जलप्रदूषण होऊ नये आणि नदीपात्र स्वच्छ राहावे, या उद्देशाने महाराष्ट्र भूषण डॉ. श्री. नानासाहेब धर्माधिकारी प्रतिष्ठान, रेवदंडा (ता. अलिबाग, जि. रायगड) यांच्या वतीने जुन्नर तालुक्यात विविध ठिकाणी निर्माल्य संकलनाचा सामाजिक व पर्यावरणपूरक उपक्रम राबविण्यात आला.
नारायणगाव, वारूळवाडी, वडगाव कांदळी, पिंपळवंडी, उदापूर, येणेरे, येडगाव तसेच पिंपळगाव तर्फे नारायणगाव आदी ठिकाणी सकाळी सात वाजल्यापासून प्रतिष्ठानच्या श्री सदस्यांनी निर्माल्य संकलन केले. नारायणगाव व वारूळवाडी येथे सुमारे दीड टन निर्माल्याचे संकलन करण्यात आले.
गणेशमूर्ती विसर्जनासाठी येणारे भाविक फुले, हार, निर्माल्य, प्लास्टिक पिशव्या, कागद, कॅरीबॅग तसेच केळीचे खुंट आदी साहित्य नदीपात्रात सोडतात. त्यामुळे नदीचे पाणी दूषित होऊन दुर्गंधी निर्माण होते. जलप्रदूषणाचा मानवी जीवनासह परिसरातील नागरिकांच्या आरोग्यावर विपरीत परिणाम होऊ नये, या उद्देशाने हा उपक्रम राबविण्यात आला.
पद्मश्री महाराष्ट्र भूषण डॉ. आप्पासाहेब धर्माधिकारी व डॉ. सचिनदादा धर्माधिकारी यांच्या मार्गदर्शनाखाली निर्माल्य संकलनाचा हा उपक्रम महाराष्ट्रभर राबविण्यात येत असल्याची माहिती प्रतिष्ठानच्या श्री सदस्यांनी दिली.
संकलित केलेल्या निर्माल्यापासून कंपोस्ट खत तयार करण्याचा प्रतिष्ठानचा मानस असून, या खताचा वापर प्रतिष्ठानच्या वतीने करण्यात आलेल्या वृक्षारोपणातील झाडांसाठी केला जाणार आहे. त्यामुळे निर्माल्याचे योग्य व्यवस्थापन होण्याबरोबरच पर्यावरण संवर्धनालाही हातभार लागणार आहे.
दरम्यान, पिंपळगाव तर्फे नारायणगाव येथे मीना नदीवरील पुलाजवळ गुंजाळवाडी व पिंपळगाव परिसरातील गणेशभक्तांसाठी निर्माल्य संकलन केंद्र उभारण्यात आले होते. यावेळी गुंजाळवाडीचे ज्येष्ठ सामाजिक कार्यकर्ते शरद शेठ दरेकर यांनी प्रतिष्ठानच्या या उपक्रमाचे कौतुक करत मनोगत व्यक्त केले.
या उपक्रमासाठी नारायणगाव येथे २५, तर वारूळवाडी येथे १५ श्री सदस्यांनी स्वयंस्फूर्तीने सहभाग घेतला. नदी स्वच्छता, जलप्रदूषण प्रतिबंध आणि निर्माल्याचा पुनर्वापर या त्रिसूत्रीमुळे या उपक्रमाचे परिसरातून कौतुक होत आहे.
