ग्रामस्थांच्या समस्या जाणून घेतल्या; तातडीने उपाययोजना करण्याचे अधिकाऱ्यांना निर्देश
शितल पिंगळे : Navimumbailive.com@gmail.com
कुडाळ : सिंधुदुर्ग जिल्ह्यात दुष्काळसदृश परिस्थिती गंभीर होत असताना कुडाळ तालुक्यातील पडवे येथील थोरल्या बंधाऱ्याची कुडाळ-मालवणचे आमदार निलेश राणे यांनी पाहणी केली. यावेळी त्यांनी ग्रामस्थांशी संवाद साधत त्यांच्या विविध मागण्या आणि समस्या जाणून घेतल्या. पाणीटंचाईच्या पार्श्वभूमीवर परिस्थितीचा आढावा घेत संबंधित अधिकाऱ्यांना आवश्यक त्या उपाययोजना तातडीने करण्याचे निर्देशही त्यांनी दिले.
दुष्काळाच्या झळा तीव्र होण्याची शक्यता लक्षात घेता पाण्याच्या उपलब्धतेसह स्थानिक ग्रामस्थांच्या समस्यांवर वेळीच उपाययोजना करणे आवश्यक आहे. या पार्श्वभूमीवर आमदार निलेश राणे यांनी थोरल्या बंधाऱ्याची पाहणी करून परिस्थिती समजून घेतली. ग्रामस्थांनी मांडलेल्या मागण्यांची दखल घेत संबंधित यंत्रणेने तातडीने कार्यवाही करावी, अशी भूमिका त्यांनी मांडली.
या पाहणीवेळी शिवसेना जिल्हाप्रमुख दत्ता सामंत, जिल्हा परिषद उपाध्यक्ष दादा साईल, शिवसेना महिला जिल्हाप्रमुख दीपलक्ष्मी पडते, बाबा परब, संतोष साठविलकर, किसन मांजरेकर, सरपंच मृणाली परब, मंदार पडवळ, शाखाप्रमुख निलेश परब, धायाजी परब यांच्यासह ग्रामस्थ उपस्थित होते.
