सुवर्णा खांडगेपाटील : Navimumbailive.com@gmail.com
‘लोकशाही वाचवा, अराजकता हटवा’चा नारा; घुसखोर आणि देशविरोधी शक्तींविरोधात एकजुटीचे आवाहन
मुंबई : ‘लोकशाही वाचवा, अराजकता हटवा’ या घोषणेसह भाजपा महायुतीच्या वतीने दादर येथे भव्य पदयात्रेचे आयोजन करण्यात आले. मुख्यमंत्री देवेंद्र फडणवीस आणि भाजपचे प्रदेशाध्यक्ष रवींद्र चव्हाण यांच्या नेतृत्वाखाली काढण्यात आलेल्या या पदयात्रेत मत्स्यव्यवसाय व बंदरे मंत्री तथा सिंधुदुर्गचे पालकमंत्री नितेश राणे यांनी सहभाग घेतला. संविधानाचा सन्मान, लोकशाही मूल्यांचे रक्षण आणि देशाची एकता-अखंडता कायम राखण्याचा संदेश यावेळी देण्यात आला.
या पदयात्रेदरम्यान मंत्री नितेश राणे यांनी विरोधकांवर टीका करत संविधान आणि देशाच्या सुरक्षेचा मुद्दा उपस्थित केला. ते म्हणाले, “ही लढाई संविधान विरुद्ध शरियाची आहे. डॉ. बाबासाहेब आंबेडकर यांनी दिलेले संविधान इंडिया आघाडीला मान्य नाही. राहुल गांधी आणि इंडिया आघाडीचे नेते पाकिस्तानची स्क्रिप्ट वाचून देशात अराजकता निर्माण करण्याचा प्रयत्न करतात,” असा आरोप त्यांनी केला.
घुसखोर आणि देशविरोधी शक्तींविरोधात सर्वांनी भारतीय म्हणून एकत्र येण्याची गरज असल्याचे सांगत, देशाची एकता, अखंडता आणि संविधानाच्या रक्षणासाठी एकजुटीचा संदेश या पदयात्रेतून देण्यात यावा, असे आवाहनही राणे यांनी केले.
या पदयात्रेत केंद्रीय मंत्री रामदास आठवले, विधानपरिषद उपसभापती सचिन अहिर, मंत्री मंगलप्रभात लोढा, मुंबईच्या महापौर रितू तावडे, मुंबई भाजप अध्यक्ष अमित साटम यांच्यासह महायुतीचे आमदार, पदाधिकारी आणि कार्यकर्ते मोठ्या संख्येने सहभागी झाले होते.
भाजपा महायुतीच्या या पदयात्रेतून लोकशाही मूल्यांचे संरक्षण, संविधानाचा सन्मान आणि राष्ट्रीय एकात्मतेचा मुद्दा अधोरेखित करण्यात आला. मंत्री नितेश राणे यांनी आपल्या भाषणातून घुसखोरी, देशविरोधी शक्ती आणि विरोधकांच्या भूमिकेवर केलेल्या टीकेमुळे पदयात्रेत राजकीय मुद्द्यांनाही विशेष महत्त्व प्राप्त झाले.
