सागरी क्षेत्रात ७६ हजार कोटींचे गुंतवणूक करार; महाराष्ट्र गुंतवणूकदारांसाठी सज्ज !
मुंबई वॉटर मेट्रोसह बंदर, जहाजबांधणी आणि लॉजिस्टिक्स क्षेत्राला चालना देणार – मंत्री नितेश राणे
मुंबई : महाराष्ट्राचा विस्तीर्ण समुद्रकिनारा, नैसर्गिक बंदरे आणि मजबूत औद्योगिक पायाभूत सुविधा ही जागतिक गुंतवणूकदारांसाठी मोठी संधी आहे. राज्याच्या सागरी क्षेत्रात तब्बल ७६ हजार कोटी रुपयांचे गुंतवणूक करार झाले असून, बंदरे, जहाजबांधणी, शिपिंग आणि लॉजिस्टिक्स क्षेत्राच्या विकासासाठी महाराष्ट्र सज्ज आहे. जागतिक गुंतवणूकदारांनी राज्यात उद्योग उभारून सागरी अर्थव्यवस्थेच्या विकासात सहभागी व्हावे, असे आवाहन मत्स्यव्यवसाय व बंदरे मंत्री नितेश राणे यांनी केले.
फेडरेशन ऑफ इंडियन चेंबर्स ऑफ कॉमर्स अँड इंडस्ट्री (FICCI) यांच्या वतीने गोरेगाव येथील नेस्को येथे २ ते ४ नोव्हेंबरदरम्यान आयोजित चौथ्या ‘मॅरिटाइम इंडिया कॉन्फरन्स अँड एक्सपो’चे उद्घाटन मंत्री नितेश राणे यांच्या हस्ते झाले. यावेळी त्यांनी महाराष्ट्रातील सागरी क्षेत्रातील गुंतवणुकीच्या संधी आणि भविष्यातील विकास योजनांची माहिती दिली. या परिषदेत नऊ देशांचे प्रतिनिधी सहभागी झाले आहेत.
महाराष्ट्राच्या सागरी क्षेत्रात गुंतवणुकीला चालना देण्यासाठी पायाभूत सुविधांचा विस्तार आणि गुंतवणूकदारांसाठी ‘वन विंडो क्लिअरन्स’ सुविधेवर भर दिला जात आहे. बंदरांची क्षमता वाढविणे, जहाजबांधणी व जहाज दुरुस्ती उद्योग विकसित करणे आणि निर्यात व लॉजिस्टिक्स क्षेत्राला गती देणे ही शासनाची प्रमुख उद्दिष्टे असल्याचे राणे यांनी सांगितले.
मुंबईतील जलवाहतुकीला आधुनिक स्वरूप देण्यासाठी ‘मुंबई वॉटर मेट्रो’सारख्या महत्त्वाकांक्षी संकल्पनांवरही काम करण्यात येत आहे. मुंबई वॉटर मेट्रो ही जगातील सर्वात मोठी जलवाहतूक व्यवस्था ठरेल, असा विश्वास त्यांनी व्यक्त केला.
सागरी क्षेत्रातील गुंतवणुकीतून उद्योगविस्तारासोबतच राज्यात रोजगाराच्या मोठ्या संधी निर्माण होतील. भारताची सागरी अर्थव्यवस्था बळकट करण्यासाठी महाराष्ट्र महत्त्वाची भूमिका बजावेल आणि राज्याला जागतिक सागरी व्यापाराचे प्रमुख केंद्र बनविण्यासाठी प्रयत्न सुरू असल्याचे मंत्री नितेश राणे यांनी स्पष्ट केले.
