वाशीचा एसटी बसथांबा बनलाय अवैध प्रवासी वाहतुकीचे माहेरघर

संदीप खांडगेपाटील : 8082097775
सायन-पनवेल महामार्गावर असलेला वाशी सेक्टर 17 मधील वाशी प्लाझा समोरील एसटी बसेसचा थांबा गेल्या अनेक वर्षापासून अवैध प्रवासी वाहतुकीचे माहेरघर बनला असून आजही या पहाटेपासून ते रात्री उशिरापर्यत या एसटी बसथांब्यावर मोठ्या प्रमाणावर अनधिकृत प्रवासी वाहतुक होत आहे. विशेष म्हणजे एसटी महामंडळाचे कर्मचारी व अधिकारी तसेच वाहतुक पोलीसही या एसटी बसथांब्यावर असतानादेखील ते या अनधिकृत प्रवासी वाहतुकीकडे कानाडोळा करताना पहावयास मिळत आहे.
सायन-पनवेल महामार्गावरील वाशी प्लाझासमोरील हा एसटी बसथांबा अवैध प्रवासी वाहतुकीसाठी दोन दशकाहून अधिक काळ प्रसिध्द आहे. एसटी महामंडळाच्या अधिकारी व कर्मचार्‍यांनी तसेच वाहतुक पोलिसांनी या ठिकाणच्या अनधिकृत प्रवासी वाहतुकीकडे कानाडोळा केल्याने या घटकांचे धाडस अलिकडच्या काळात वाढीस लागले आहे. अवैध प्रवासी वाहतुक करणार्‍यांची वाहने एसटी थांब्यावरच उभी राहू लागल्याने मानखुर्दच्या दिशेने आलेल्या एसटी बसेसना उभे राहण्यासाठी जागा शोधण्याची पाळी आली आहे.
या एसटी बसथांब्यावर सकाळी व रात्री लक्झरी खासगी बसेेस मोठ्या प्रमाणावर उभ्या असतात. अलिकडच्या काळात सॅट्रो, मारूती व्हॅन व अन्य चारचाकी वाहने, इनोव्हा, झायलो आदी वाहनेदेखील बिनधास्तपणे उभे राहून वाहनचालक खारघर, कामोठे, पनवेल असे जोरदार ओरडत प्रवाशांना साद घालताना पहावयास मिळत आहे. पुणे, सातारा, सांगली, कोल्हापुर,अहमदनगर, नाशिक तसेच कोकणात जाण्यासाठीदेखील लक्झरी बसेस व अन्य वाहने या एसटी थांब्यावर उभे राहून प्रवाशांना घेवून जात आहे.
या एसटी बसथांब्याच्या विरूध्द बाजूलाच उड्डाणपुलाखाली वाहतुक पोलिसांची वाशी चौकी असतानाही मोठ्या संख्येने उपलब्ध असणारे वाहतुक पोलीसदेखील या अवैध प्रवासी वाहतुकीबाबत केवळ बघ्याची भूमिका घेत आहेत. एसटी महामंडळाचे कर्मचारी व अधिकारीदेखील या ठिकाणी उपलब्ध असताना ते या अवैध प्रवासी वाहतुकीबाबत बघ्याची भूमिका घेत आहेत. या अवैध प्रवासी वाहतुकीमुळे दररोज एसटी महामंडळाचे हजारो रूपयांचे नुकसान होत आहे.
या एसटी बसथांब्यांकडे वाहतुक पोलीस, एसटी महामंडळाचे कर्मचारी-अधिकार्‍यांप्रमाणे नवी मुंबई महापालिका प्रशासनाच्या अतिक्रमण विभागाने कानाडोळा केल्यामुळे या ठिकाणी बकालपणा व अतिक्रमणाचा विळखा वाढीस लागला आहे. फेरीवाले, टपरीवाले, किरकोळ खाद्य विकणार्‍यांच्या गाड्यांदेखील या ठिकाणी अतिक्रमण करून कचरा टाकून बकालपणा वाढवित असताना महापालिका प्रशासनाचा अतिक्रमण विभाग येथील अतिक्रमणाकडे कानाडोळा करत आहे.